Дар миёни кишварҳои Осиёи Марказӣ дар масъалаи муҳоҷирати шаҳрвандонашон ба дигар кишварҳо Тоҷикистону Узбекистон пешсафанд.
Бино ба гузориши созмони байналмилалии мустақили тиҷоратии WorldPopulationReview, дар давоми ҳар 26 дақиқа 1 нафар ва дар як шабонарӯз 55 нафар Тоҷикистонро тарк мекунанд.
Дар гузориши ин созмон гуфта мешавад, ки дар ҳоли ҳозир теъдоди аҳолии Тоҷикистон ба 10 млн 223 ҳазору 236 нафар расида, дар як рӯз 703 нафар таваллуд мешавад ва 130 кас мефавтад.
Ба гуфтаи коршиносони WorldPopulationReview, соли 2035 аҳолиии кишвар ба 12,4 млн нафар баробар мешавад.
Дар миёни кишварҳои Осиёи Марказӣ Узбекистону Тоҷикистон дар масъалаи муҳоҷирати шаҳрвандонашон омори якхела доранд. Тибқи оморҳои ин созмон, Узбекистонро низ ҳамарӯза 55 ва ҳар 26 дақиқа 1 нафар тарк мекунад.
Аммо теъдоди аҳолии ин кишвар ба 35 млн 384 ҳазору 614 нафар баробар буда, дар 1 шабонарӯз таваллуди 2067 тифли навзод ва 580 ҳолати маргу мир ба қайд гирифта шудааст.
Сокинони дигар кишварҳои дигари Осиёи Марказӣ кишварҳои худро камтар тарк мекунанд, аз ҷумла дар як шабонарӯз Қирғизистонро 27 нафар ва Туркманистонро 11 нафар тарк мекунанд.
Гуфта мешавад, Қирғизистон 6 млну 779 ҳазору 345 нафар аҳолӣ дошта, дар ин кишвар дар 1 шабонарӯз сатҳи таваллуд ба 417 нафар ва маргу мир ба 104 кас баробар аст.
Туркманистон бо доштани 6 млн 551 ҳазору 314 нафар аҳолӣ, дар як шабонарӯз 358 тифли навзод таваллуд шуда, 118 нафар мемиранд.
Дар ин гузориш омори муҳоҷират дар Қазоқистон, ки 19 млну 696 ҳазору 134 нафар аҳолӣ дорад, оварда нашудааст. Аммо дар ин кишвар сатҳи таваллуд ба 1082 нафар ва маргу мир ба 501 нафар дар як рӯз баробар аст.
Коршиносон сабаби зиёд будани омори муҳоҷират дар Тоҷикистонро ба набуди шароити хуби зиндагӣ ва набуди ҷойи кор рабт медиҳанд.
