Бино ба иттилои Вазорати корҳои дохилии Тоҷикистон, як зани 33-солаи сокини ноҳияи Деваштичи вилояти Суғд ба сабаби фишори зиёди хусуру хушдоманаш худро ба дор овехта, ҷон бохтааст.
Мақомоти Вазорати корҳои дохилӣ мегӯянд, нисбати хусури 65-сола ва хушдомани 63-солаи ин зан парвандаи ҷиноятӣ бо моддаи 109 қисми 2 Кодекси ҷиноятии Ҷумҳурии Тоҷикистон боз шудааст. Аммо маълум нест, ки гумонбаршудагон дар боздоштанд ва ё дар озодӣ.
“Гумонбаршавандагон аз соли 2021 то инҷониб нисбати келинашон, зани 33-солаи сокини ҳамон ҷо суханҳои кабеҳ гуфта, мунтазам шаъну шарафашро паст задааанд, ки дар натиҷа ҷабрдида 17-уми ноябри соли 2023, тахминан соати 11:10-дақиқа, дар хонаи истиқоматиашон худро бо роҳи доркашӣ ба ҳалокат расонидааст.”, омадааст дар хабари ВКД.
Гуфта мешавад, дар робита ба ин қазия мақомоти корҳои дохилӣ тафтишотро шуруъ кардаанд.
То ҳол назари наздикон ва вакили дифои гумонбаршудагон дастраси расонаҳо нашудааст ва маълум нест, ки онҳо ин иттиҳомро эътироф кардаанд ё на.
