Аксари кишварҳои узви Созмони Милали Муттаҳид бо иттифоқи оро гуфтанд, ки ҷанг дар Фаластин қатъ карда шавад.
Бино ба иттилои расмӣ, 12- уми декабри соли 2023 Маҷмаи умумии Созмони Милали Муттаҳид бо баргузории як нишаст Қатъномаеро қабул кард, ки бар асоси он ҷанг дар Навори Ғазза бояд фавран қатъ карда шавад.
Дар вақти раъйгирӣ 153 кишвари узви Созмони Милали Муттаҳид, ҳама кишварҳои исломӣ ва арабӣ, инчунин аксари кишварҳои узви Иттиҳоди Аврупо ба ҷонибдорӣ аз ин Қатънома раъйи мусбат доданд.
Аммо дар муқобил 10 кишвари дунё, бахусус Иёлоти Муттаҳидаи Амрико, Исроил ва 8 кишвари дигар аз он ҷонибдорӣ накарда, раъйи манфӣ додаанд.
Инчунин кишварҳое мисли Олмон, Утриш (Австрия) Итолиёву Гурҷистон ва 19 кишвари дигар ҳам дар вақти овоздиҳӣ ба ин Қатънома аз ҳар гуна раъй додан имтиноъ карданд.
Гуфта мешавад, аз замони оғози ҳамлаҳои Исроил ба Навори Ғазза 67 рӯз мегузарад, аммо бо гузашти беш аз ду моҳ Телавив натавонистааст, ки ба ҳеч яке аз ҳадафҳои асосии худ, ки иборат аз озодии асирон, саркӯби нерӯҳои фаластинӣ ва аз байн бурдани ҲАМОС аст, даст ёбад.
Исроил ин ҷангро пас аз ҳамлаҳои нерӯҳои фаластинӣ ва бахусус ҲАМОС ба минтақаи Девори Ғазза, ки тибқи қарорҳои Созмони Милали Муттаҳид бахше аз заминҳои ишғолшуда тавассути Исроил дониста мешаванд, оғоз карда буд.
Маҷмаи умумии Созмони Милали Муттаҳид тайи 5 соли ахир зиёда аз 150 қарор ва қатънома дар бораи қатъи зулму ситамҳои Исроил алайҳи фаластиниҳо қабул карда аст, аммо Телавив ҳеч яке аз онҳоро дар амал пурра татбиқ накардааст. Ба ҳамин хотир, бисёриҳо амалӣ шудани ин Қатъномаро ҳам зери суол мебаранд.
