Кишвари Ҷопон дар дидоре бо мақомоти тоҷик ваъда дода, ки дар робита ба тақвияти марзҳои Тоҷикистон ба Хадамоти гумруки кишвар кумак мекунад.
Бино ба иттилои маркази матбуоти Хадамоти гумруки назид ҳукумати Тоҷикистон, 15-уми декабри соли ҷорӣ ҳайате аз Агентии Ҷопон оид ба ҳамкориҳои байналмилалии (JICA) бо муовини якуми сардори Хадамоти гумруки назди Ҳукумати Ҷумҳурии Тоҷикистон Турсунзода Азим Ҳайдар дар Душанбе мулоқот карданд.
Гуфта мешавад, ки дар мулоқоти ҷонибҳо масъалаи омода намудани мутахассисони соҳаи гумрук ва таҳияи лоиҳа дар робита ба тақвияти марзи Тоҷикистон ва инчунин таъмини дидбонгоҳҳои Тоҷикистон бо таҷҳизоти замонавӣ аз ҷониби Ҷопон баррасӣ гардидааст.
“Дар рафти вохурӣ ҷонибҳо доир ба самтҳои омода намудани мутахассисони соҳаи гумрук, таҳияи лоиҳа оид ба мустаҳкамгардонии сарҳад, такмил намудани вазъи иқтисодӣ ва амнияти назди сарҳадӣ, баланд бардоштани сатҳи дониши кормандон, пурзур намудани назорати гумрукӣ ва таъмини бехатарии интиқоли мол аз сарҳади гумрукӣ, беҳтар намудани савдои наздисарҳадӣ ва таъмин кардани дидбонгоҳо бо таҷҳизотҳои ҳозиразамони муоинаи гумрукӣ, мубодилаи афкор намуданд.“, омадааст дар хабари Хадамоти гумрук.
Пас аз омадани Толибон ба сари қудрат дар Афғонистон аз моҳи августи соли 2021, мақомоти Тоҷикистон бештар аз марзҳои худ нигарон аст ва ҳамеша бо ниҳодҳои байналмилалӣ ва ё кишварҳои дигар масъалаи тақвияти марзҳоро ба миён мегузорад ва то кунун барои ин лоиҳа маблағҳои зиёде низ ба даст овардааст.
Эмомалӣ Раҳмон чанд маротиба дар суханрониҳояш низ таъкид карда, ки шумори дидбонгоҳҳои марзиро дар марзҳои кишвар бештар кардааст. Ва ҳатто аз мақомоти Русия низ дар ин бора кумак хоста буд.