Аз субҳи имрӯз, 20-уми декабр нархи гази моеъ, ки аз ҳама серистифодатарин навъи сӯзишвории мошинҳо ба ҳисоб меравад, дар баъзе шаҳру навоҳии Тоҷикистон каме арзон шудааст.
Бино ба иттилои “Sputnik Тоҷикистон”, нархи ин навъи сӯзишворӣ 50 то 80 дирам арзон шудааст. То имрӯз он дар нуқтаҳои фурӯши сӯзишвории шаҳру ноҳияҳои вилояти Суғд 7,5 ва 7,8 сомонӣ фурӯхта мешуд ва ҳоло то 7 сомонӣ поён фаромадааст.
Баъзе масъулони нуқтаҳои фурӯши сӯзишворӣ гуфтаанд, ки дар давоми ҳафтаи ҷорӣ нархи яклухти ин сӯзишворӣ каме арзон шуд ва аз ин рӯ нархи чаканаи он низ поён фаромад.
Мурод Ӯрунов, яке аз роҳбарони ширкатҳои таъминоти сӯзишвории нақлиёт дар шаҳри Хуҷанд дар суҳбат бо “Sputnik Тоҷикистон” гуфта, ки “Ҳар кило гази моеъро ширкатҳои яклухтфурӯши бо қимати камтар аз 12 сомонӣ дастрас карда истодаанд. Пештар нархи яклухти он то ба 13 сомонӣ баланд шуда буд. Ҳар қадаре, ки нархи яклухти бор арзон дастрас шавад, фурӯши чакана ҳамон қадар поён мешавад”.
Бо вуҷуди арзон шудани ин навъи серистеъмоли сӯзишворӣ, ҳамоно дар қиёс ба соли гузашта хеле гарон боқӣ мемонад. Ҳоло нархи гази моеъ агар 7 сомонӣ шуда бошад, дар қиёс ба ҳамин давраи соли гузашта нархи он то 5,5 сомонӣ буд. Аммо бензин бошад, ҳоло дар тоблуҳои бензинфурӯшӣ нархи як литр бензини навъи АИ 92 10,6 сомонӣ аст, ки дар қиёс ба ҳамин давраи соли гузашта ин бензин аз 7 то 8,10 сомонӣ арзиш дошт. Ва навъи АИ 95, ки ҳоло 11 сомонӣ нарх дорад, соли гузашта 7,8 то 8,50 фурӯхта мешуд ва аммо сӯзишвории дизелӣ, ки ҳоло арзиши он 11 сомонӣ аст, имсол низ арзон нашуда, қариб ба ҳамон нархи соли гузашта боқӣ мондааст.
Аз замоне ки нархи гази моеъ дар кишвар гарон шуд, роҳкиро барои мусофиркашонӣ низ боло бурда шуд. Далели гарон кардани роҳкироро соҳибони мошинҳо ба гарон шудани газ рабт медоданд. Аммо ҳоло, ки газ каме арзон шудааст, корбарон мепурсанд, ки “газ арзон шуд, роҳкиро чӣ?” Вале то ҳол ҳеч тағйироте ба мақсади арзоншавӣ дар нархи роҳкироҳо дида нашудааст.
Ин дар ҳолест, ки Хадамоти зиддиинҳисории Тоҷикистон моҳи августи соли ҷорӣ дар нишасти матбуотие гуфта буд, ки дар шаш моҳи аввали соли ҷорӣ 207,8 ҳазор тонна гази моеъ ба маблағи 83,7 миллион доллар ва бо нархи миёнаи 403 доллар барои 1 тонна ба кишвар ворид карда шудааст. Он замон гуфта мешуд, ки ин омор нисбат ба ҳамин давраи соли гузашта 114 доллар ё 22% коҳиш ёфтааст.
Ба иттилои мақомоти расмии кишвар, аз миқдори умумии гази моеъи воридгашта ба Тоҷикистон 73,5% ба Қазоқистон, 24,7% ба Русия ва 1,9% аз Узбекистон рост меояд.
