Рӯзи 5-уми январи соли ҷорӣ мошини Салим Сайвализода, раиси ҲХДТ дар шаҳри Кӯлоб оташ гирифт, ки дар натиҷа худи ӯ осеб дида, пойи росташ шикастааст.
Тавре Радиои Озодӣ аз як манбааш дар мақомоти тафтишотии Кӯлоб хабар дод, сабаби оташ гирифтани мошини Салим Салимзода, ки навъаш “Шкода” мебошад, маълум нест. Ва мақомот гуфтаанд, ҳоло барои таҳқиқи ин ҳодиса тафтишотро оғоз карда, сабаби ин ҳодисаро мушаххас хоҳанд кард.
Мақомоти тафтишотӣ гуфтаанд, мошини раиси ҲХДТ дар шаҳри Кӯлобро “ба ташхис фиристодаанд ва натиҷаи онро мунтазиранд.” Мақомот барои чӣ гуна сар задани ҳодиса аз дӯконҳои наздик сабти наворҳои мадорбастаро талаб кардааст.
Гуфта мешавад, ин бори аввал нест, ки мошинҳои мақомдорон дар вилояти Хатлон оташ мегирад. “Шаби 26 ва 27-уми декабри 2023 мошини Бобоҷон Давлатзода, раиси дафтари “Амонатбонк” дар ноҳияи Восеъ оташ гирифт ва ҳанӯз мақомот сабаби онро шарҳ надодаанд.”
Ба ҳамин монанд моҳи феврали соли 2023 мошини Ҷумъаназар Сайидаҳамадзода, собиқ додситони ноҳияи Восеъро дар шаҳри Кӯлоб оташ заданд. “Юсуф Раҳмон, додситони кулли Тоҷикистон оташ задани мошини додситони ноҳияи Восеъро “амали қасдгирӣ” номид. Мақомот як сокини 50-солаи Кӯлобро бо иттиҳоми оташ задани мошини додситон боздошт карданд. Ҷумъаназар Сайидаҳамадзода чор моҳ баъд аз ҳодиса аз вазифаи додситонии ноҳияи Восеъ барканор шуд.”
