Раиси Маҷлиси миллии Маҷлиси Олии Тоҷикистон дар раъси як ҳайати расмӣ рӯзи душанбе, 8-уми январ ба Эрон сафар кард.
Бино ба иттилои расмӣ, дар ин сафар раиси Маҷлиси миллии Маҷлиси Олии Тоҷикистонро раисони кумитаҳои парлумони кишвар ҳамроҳӣ мекунанд.
Яке аз ҳадафҳои ин сафари ҳайати парлумонии Тоҷикистон ба Эрон “афзоиши сатҳи ҳамкориҳои парлумонӣ байни Тоҷикистон ва Эрон” арзёбӣ шудааст.
Инчунин таъкид шудааст, ки “ҷонибҳо бо таваҷҷуҳ ба мавҷудияти имконоти фаровони Тоҷикистон ва Эрон ҷиҳати афзоиши муомилоти тиҷоратии байни ду давлат то 500 миллион доллар” мувофиқат кардаанд.
Дар Теҳрон Рустами Эмомалӣ бо раиси Маҷлиси Шӯрои сломии Эрон Муҳаммадбоқир Қолибоф мулоқот карда, ҳар ду ҷониб як ёддошти тафоҳумеро низ барои ҳамкориҳои парлумонии ду кишвар имзо кардаанд.
Гуфта мешавад, ин сафари Рустами Эмомалӣ ва дигар мақомоти расмии парлумони Тоҷикистон ба Эрон дар ҳоле сурат гирифта, ки ҳамагӣ камтар аз як ҳафта пештар дар Кирмони Эрон ду таркиши хунине сурат гирифта буд. Бар асари ин таркишҳо наздик ба 100 нафар ҷонбохта ва беш аз 200 каси дигар захмӣ шудаанд. Ба гуфтаи мақомоти эронӣ, яке аз омилони ин таркишҳо шаҳрванди Тоҷикистон будааст.
Аз сӯи дигар, яке аз расонаҳои наздик ба Толибон, ки аксари вақт дар бораи фаъолияти гурӯҳи ДИИШ ва бахусус шохаи Хуросони он матлаб нашр мекунад, мақомоти Тоҷикистонро ба ҳамкорӣ бо ин гурӯҳи ҳаросафкан муттаҳам кардааст. Иттиҳоме, ки бо гузашти чанд рӯз ҳанӯз то замони нашри ин матлаб мақомоти Тоҷикистон ба он вокуниш нишон надодааст.
