Амрико бори дигар Тоҷикистонро ба хотири поймол кардани озодиҳои динӣ шаҳрвандон дар қатори кишварҳои “мавриди нигаронии хос” ворид кард.
Вазорати корҳои хориҷии Амрико 4-уми январи соли ҷорӣ гузориши тозаашро дар мавриди озодиҳои динӣ дар кишварҳои ҷаҳон нашр кард. Дар ин гузориш гуфта мешавад, ки Тоҷикистон ҳамроҳи чанд кишвари дигар ба хотири нақзи шадиди озодиҳои динии шаҳрвандон мисли солҳои пештар дар қатори кишварҳои “мавриди нигаронии хос” ворид шудааст.
Аз ҷумлаи кишварҳое, ки дар онҳо озодиҳои динии шаҳрвандон ба шиддат поймол мешавад ва дар рӯйхати “мавриди нигаронии хос” ворид шудаанд, кишварҳои Бурма, Куба, Чин, Кореяи Шимолӣ, Эрон, Никарагуа, Покистон, Русия, Арабистони Саудӣ, Тоҷикистон ва Туркманистон мебошанд. Ин дар ҳолест, ки аз байни ин ёздвҳ кишвар панҷтояш кишварҳои исломӣ ва мусалмоннишин ҳастанд.
Инчунин гуфта мешавад, поймолкунии ҷиддии озодиҳои динӣ дар кишварҳои дигаре низ ба мушоҳида мерасад, ки онҳо дар рӯйхатҳои боло ворид карда нашуданд.
Амрико аз Тоҷикистон ва дигар кишварҳое, ки дар онҳо ҳуқуқи динии шаҳрвандон поймол мешавад, хоста, ки аз ҳамла ба намояндагони ақаллиятҳои динӣ ва ҷойҳои ибодати онҳо, зӯроварии дастаҷамъӣ ва ҳабси тӯлонӣ барои баёни андешаи сулҳомез, саркӯбҳои фаромиллӣ ва даъват ба зӯроварӣ алайҳи ҷамоатҳои динӣ ва дигар қонуншиканиҳо хотима бахшанд.
Дар гузориш қайд гардида, ки масъалаи нақзи озодии динӣ дар саросари ҷаҳон сохторӣ, системавӣ ва амиқ реша давондааст. Ин кишвар аз оқибати чунин рафторҳои ҳукуматҳо дар баробари диндорон ва андешаҳои динӣ ҳушдор додааст.
