Бино ба иттилои расмӣ, 22-уми январи соли 2024 дастаи мунтахаби футболи Тоҷикистон бо мунтахаби миллии Лубнон дар доираи баргузории мусобиқоти “Ҷоми Осиё-2023” дар шаҳри Давҳа, пойтахти Қатар қувваозмоӣ мекунад.
Пеш аз ин дар 13-уми январи соли ҷорӣ мунтахаби Тоҷикистон бозиро бо дастаи мунтахаби Чин дар варзишгоҳи “Абдуллоҳ бин Халифа”-и Давҳаи Қатар ба ҳисоби 0-0 мусовӣ анҷом дода буд.
Инчунин 17-уми январи соли ҷорӣ дар бозии баъдӣ, дастаи мунтахаби Тоҷикистон бозиро бо дастаи мутанахаби Қатар бар ҳисоби 0:1 ба нафъи кишвари мизбон дар Давҳа бохт. Қатар якуминшуда билофосила баъд аз пирӯзӣ ба марҳилаи 1/8 ниҳоӣ роҳ ёфт.
Гуфта мешавад, Тоҷикистон барои нахустин бор дар мусобиқоти “Ҷоми Осиё-2023” иштирок мекунад. Мунтахаби Тоҷикистон дар “гурӯҳи А” бозӣ мекунад. Ғолибони ин давра аз ҳама гурӯҳҳо ба даври 1/8 ниҳоии Ҷоми Осиё-2023 роҳ меёбанд.
Ёдовар мешавем, ки Эмомалӣ Раҳмон зимни сафараш ба Қатар бо дастаи мунтахаби футболи Тоҷикистон, ки ҳоло дар ин кишвар қарор доранд, вохӯрда, онҳоро барои ин бозӣ тавшиқ кард, вале ҳеч гуна ваъдаи кумакҳои пулӣ ва молие, ки дили онҳоро гармтар кунад, надод.
