Рӯзи 23-уми январи соли ҷорӣ артиши Исроил хабар дод, ки дар давоми 24 соати гузашта 24 сарбоз ва афсарраш дар набардҳои шаҳри Хон Юнус дар Ғазза кушта шудаанд.
Вазорати дифои Исроил рӯзи гузашта аввал аз кушта шудани 3 сарбоз хабар дода буд, вале баъдтар эътироф кард, ки 21 сарбоз ва афсари ин кишвар дар як таркише дар дохили бино кушта шудаанд.
Дониел Ҳагари, сухангӯи артиши Исроил дар шарҳи ин қазия гуфт, ки шаби гузашта сарбозон вориди ду биное шуда буданд, ки марбути гурӯҳи ҲАМОС буд, дар ин ҳангоми аз дур бо силоҳи RPG як нафар тир кушод ва биноҳо аз қабл бомбгузорӣ шуда будаанд, ки дар натиҷа таркиши бузурге ба вуҷуд омад ва биноҳо рӯи сарбозон сарозер шуданд ва якбора 21 нафар ҷонбохту чанд сарбози дигар маҷруҳ шуд.
Сухангӯи артиши Исроил мегӯяд, наҷот додани сарбозон давоми шаб соатҳо тӯл кашид то тавонистанд ҷасадҳоро аз зери овораҳо берун бароранд. Ӯ ҳамчунин афзуд, ки тонке, ки барои таъмини амнияти сарбозон наздики онҳо буд, он ҳам оташ гирифт ва сарбозони дар дохилбуда ҳама осеб дидаанд.
Бо эълони кушта шудани 24 сарбоз шумори умумии кушташудагони артиши Исроил аз оғози ҷанг дар 7-уми октябри соли 2023 то кунун ба 559 нафар ва аз замони ворид шудан ба дохили Ғазза ба 229 сарбозу афсар расидааст.
Аммо дар баробари ин, тибқи маълумоти Вазорати тандурустии Фаластин, дар пайи ҳамлаҳои густардаи Исроил омори кушташудагони аҳолии Ғазза ба беш аз 25 ҳазор нафар арсид, ки 70% онҳоро кӯдакону занон ва солмандон ташкил медиҳанд.
