Вазири корҳои хориҷии Тоҷикистон Сироҷиддин Муҳриддин зимни нишасти Созмони ҳамкории исломӣ аз ҷомеаи ҷаҳонӣ таваққуфи фаврии ҷанг дар Ғаззаро талаб кардааст.
Вазорати корҳои хориҷии Тоҷикистон бо нашри иттилоияе хабар дода, ки Сироҷиддин Муҳриддин 5-уми марти соли 2024 дар ҷаласаи ғайринавбатии Шӯрои вазирони корҳои хориҷии кишварҳои узви Созмони ҳамкории исломӣ, ки дар робита ба мавзуи Фаластин бахшида шуда буд, ширкат ва суханронӣ кардааст.
Сироҷиддин Муҳриддин зимни суханронияш “аз ҷомеаи ҷаҳонӣ анҷоми иқдоми муассирро ҷиҳати оташбаси фаврӣ дар Фаластин ва бо роҳи мусолиҳатомез расидан ба сулҳи пойдор дар ин минтақа”-ро талаб кардааст.
Аз ин пештар мақомоти Тоҷикистон хостори оташбаси фаврӣ дар Ғазза шуда буд. Аз ҷумла, намояндаи Тоҷикистон дар Созмони Милали Муттаҳид моҳи декабри соли 2023 аз қатъномаи оташбаси фаврии башардӯстона дар Ғазза пуштибонӣ карда буд.
Гуфта мешавад, Исроил 17 сол қабл Навори Ғаззаро дар муҳосираи худ қарор дода, атрофи онро девор гирифтааст. Дар ин муддат ҳамагуна содирот ва воридот ба Навори Ғаззаро зери назорати шадиди худ қарор дода, фишори зиёде болои сокинони он меовард. Ин муҳосира дар 5 моҳи ахир шадидтар шудааст.
Ёдовар мешавем, ки 7-уми октябри соли 2023 нерӯҳои фаластинӣ бо раҳбарии ҲАМОС ва Ҷиҳоди исломӣ аз чанд ҷо деворҳоро шикаста, ба сарзаминҳои ишғолӣ ҳамла карданд. Исроил мегӯяд, ки нерӯҳои фаластинӣ дар вақти ҳамлаи худ ҳудуди 1200 нафарро кушта ва беш аз 260 нафари дигарро ба асорат гирифтанд. 8-уми октбяри соли 2023 Исроил ҳамлаҳои худ ба Навори Ғаззаро оғоз кард ва то ҳол ин ҷангҳо идома доранд.
Дар давоми 5 моҳ артиши Исроил Ғаззаро аз тариқи заминӣ ва ҳавоӣ бомборон дорад. Ба иттилои Вазорати беҳдошти Фаластни, аз шуруи ҷанг то ин муддарт беш аз 31 ҳазор нафар кушта шудааст, ки 70 дарасди онҳоро занону кӯдакон ташкил медиҳанд ва беш аз 70 ҳазор каси дигар захмӣ шудаанд.
