Ҷумҳурии исломии Эрон аз омодагии худ дар бораи ҳамкорӣ бо Тоҷикистон дар соҳаи дорусозӣ ва таҷҳизоти пизишкӣ хабар дод.
Хабаргузории Sputnik аз расонаҳои эронӣ иттилоъ дод, ки зимни як ҳамоиши муштараки намояндагони Тоҷикистону Эрон вазири беҳдошт, дармон ва омӯзиши пизишкии ин кишвар доктор Баҳром Айнуллоҳӣ изҳор дошта, ки кишвараш омода аст доруҳо ва таҷҳизоти пизишкии худро ба Тоҷикистон содир кунад ва тавлидоти муштараки доруро роҳандозӣ кунанд.
Ҳамчунин ин вазири эронӣ афзуда, ки ҳамкориҳои муштарак бо Вазорати тандурустии Тоҷикистон дар робита ба омӯзиши пизишкӣ ва дармон, аз ҷумла “табодули устод ва донишҷӯ, баргузории ҳамоишҳои илмии муштараку иҷрои барномаҳои таҳқиқотӣ ва пажӯҳишӣ” метавонад ҷузъи барномаҳои ҳамкории дуҷониба бошад.
“Яке аз муҳимтарин барномаҳое, ки дар ҳавзаи беҳдошт иҷро шудааст, барномаи саломатии хонавода аст, ки омодагӣ дорем таҷрибаи худро дар ин замина дар ихтиёри Тоҷикистон қарор диҳем”, – афзудааст вазир.
Доктор Айнуллоҳӣ дар идома ба пешрафтҳои таҳқиқотии Эрон дар самти табобати саратон ишора карда, гуфтааст, ки дар ин замина метавонанд бо Тоҷикистон ҳамкориҳои таҳқиқотӣ ва дармонӣ дошта бошанд.
Дар хабар таъкид шуда, ки ҷониби Тоҷикистон, бахусус вазири тандурустии Тоҷикстон Ҷамолиддин Абдуллозада низ дар ин дидор пешниҳодоти ҷониби Эронро пазируфта ва барои тақвияти бештари ҳамкориҳо изҳори омодагӣ кардааст.
