Мақомоти Италия 8 узви Ҳаракати сиёсии “Гурӯҳи 24”-ро, ки рӯзи 22-уми апрел ба шаҳри Руми Италия рафта буданд, боздошт карданд.
Гуфта мешавад, ин афрод барои барпо кардани гирдиҳамоии эътирозӣ бар зидди сафари раисҷумҳури худкомаи Тоҷикистон Эмомалӣ Раҳмон ба Италия рафта буданд.
Ҳамаи боздоштшудаҳо ҳуҷҷати паноҳандагии кишвари Олмонро доштаад. Онҳо рӯзи 23-уми апрел дар назди қасри президенти Италия, ки мунтазири берун шудани Эмомалӣ Раҳмон буданд, аз ҷониби пулис боздошт шудаанд.
Бино ба навиштаи сомонаи “Гурӯҳи 24”, мақомоти Тоҷикистон пеш аз сафари Эмомалӣ ба Рум, барои пешгирӣ аз эътирози фаъолони ин гурӯҳи сиёсии тоҷик мақомоти Италияро огоҳ карда будааст.
Ба эҳтимоли зиёд аъзои дастгиршудаи “Гурӯҳи 24” то поёни сафари Эмомалӣ Раҳмон дар боздошт хоҳанд монд.
Боздошти аъзои “Гурӯҳи 24” дар шаҳри Руми Италия дар ҳоле сурат мегирад, ки чанде аз аъзои ин ҳаракат дар сафари охири Эмомалӣ ба Берлин ба корвони мошинҳои ӯ тухм партоб карданд ва ин боиси хашми мақомоти тоҷик гашт, ки дар натиҷа пайвандони мухолифнро дар дохили Тоҷикистон зери фишори сахт қарор доданд.
