Вазорати корҳои хориҷии Тоҷикистон бо нашри як иттилоия ба шаҳрвандони кишвар тавсия додааст, ки бе зарурат муваққатан ба Русия сафар накунанд.
Бино ба иттилои расмӣ, 27-уми апрели соли 2024, Вазорати корҳои хориҷии кишварамон бо нашри як иттилоия аз шаҳрвандони Тоҷикистон хост, ки бе зарурат муваққатан ба қаламрави Русия сафар накунанд.
Вазорати корҳои хориҷии Ҷумҳурии Тоҷикистон бидуни шарҳу тафсилоти иловагӣ таъкид кардааст, ки “ба шаҳрвандони ҷумҳурӣ тавсия медиҳад, ки аз сафар ба қаламрави Русия тавассути ҳамаи воситаҳои нақлиёт бе зарурат мувақаттан худдорӣ намоянд.”
Ин тавсияи Вазорати корҳои хориҷии Тоҷикистон дар ҳоле сурат мегирад, ки баъд аз ҳодисаҳои хунини Маскав ва иттиҳомоти мақомоти Русия алайҳи бархе муҳоҷирони тоҷикистонӣ фишорҳои мақомоти Русия болои муҳоҷирони корӣ дар Маскав ва бархе дигар шаҳру вилоятҳои ин кишвар мавҷи вокунишҳои мухталиферо ба бор овардааст.
Инчунин мақомоти интизомии Русия баъд аз ин ҳодисаҳо дар вилояти Маскав ва бархе дигар шаҳру вилоятҳо амалиётҳои тафтиши ҳуҷҷату асноди муҳоҷирони корӣ аз кишварҳои Осиёи Марказӣ ва бахусус Тоҷикистонро хона ба хона ҳам рӯи даст гирифтаанд.
Гуфта мешавад, дасти кам дар даҳ соли ахир ин бори аввал аст, ки муомилаи мақомоти Русия дар муносибат бо шаҳрвандони Тоҷикистон то ин ҳад нигаронкунанда шудааст, ки Вазорати корҳои хориҷии кишвар нимашаб ба шаҳрвандони ҷумҳурӣ тавсия додааст, ки “аз сафар ба қаламрави Русия тавассути ҳамаи воситаҳои нақлиёт бе зарурат муваққатан худдорӣ намоянд.”
