Эҳтимол меравад Додгоҳи байналмилалии ҷиноӣ барои боздошти Бинёмин Натанёҳу, нахуствазири Исроил ҳукм содир кунад.
Тавре расонаҳои исроилӣ гузориш медиҳанд, эҳтимоли судури ҳукми боздошти Натанёҳу аз сӯи Додгоҳи байналмилалии ҷиноӣ ӯро бисёр нигарон ва ошуфта кардааст.
Ҳатто рӯзномаи “Маъарив”-и Исроил, ки яке аз пурхонандатарин рӯзномаҳои дар ин кишвар аст, ба нақл аз манобеи худаш навишта, ки “Натанёҳу дар ин шабу рӯзҳо аз эҳтимоли судури қарори боздошт алайҳи худаш аз сӯи Додгоҳи байналмилалии ҷиноӣ шадидан ва ба сурати ғайриоддӣ музтариб ва парешон аст.”
Дар ин гузориш таъкид шуда, ки Натанёҳу барои пешгирӣ аз судури ҳукми боздошташ дар давоми чанд рӯзи ахир бо раҳбарони мақомҳои байналмилалии гуногун, аз ҷумла бо Ҷо Байден, расиҷумҳури Амрико тамосҳои телефонии зиёде доштааст.
Гуфта мешавад, Натанёҳу ба таври ғайримустақим Бойденро таҳти фишор қарор дода ва талош дорад то пеши ҳукми боздошташ бо ҳар роҳе, ки бошад гирифта шавад.
Ба иттилои расонаҳои исроилӣ, Шӯрои амнияти миллии ин кишвар эълом карда, ки эҳтимол меравад Додгоҳи байналмилалии ҷиноӣ ҳамроҳи Натанёҳу инчунин ҳукми боздошти Юаф Галант, вазири дифоъ ва Ҳертси Ҳалеви, раиси Ситоди кулли артиши Исроилро низ содир кунад.
Худи Натанёҳу рӯзи 26-уми апрел дар шабакаи иҷтимоии Х бо нашри паёме навишта буд: “Исроил бо раҳбарии ман иҷозат нахоҳад дод, ки ҳаққи дифоъ аз худ бо иқдоми Додгоҳи байналмилалии ҷиноӣ тазъиф шавад. Таҳдид ба асорати раҳбарон ва сарбозони танҳо давлати демократӣ дар Ховари Миёна ва танҳо кишвари яҳудӣ дар ҷаҳон ғайри қобили қабул аст.”
Натанёҳу дар ин посташ навишта, ки дар баробари чунин қарорҳо “сар хам намекунад” ва онро намепазирад.
Дар вокуниш ба ин изҳори назари нахуствазири Исроил бархе таҳлилгарон мегӯянд, ки “аз ин навиштаи Натанёҳу маълум мешавад, ки ӯ аз ояндаи худ сахт нигарон аст, чун дар ҳолати боздошт зиндонӣ шудан барои солҳои тӯлонӣ ӯро интизор аст ва барои пешгирии ин кор тамоми талошашро мекунад, то ҷанг дар Ғазза идома дошта бошад. Ҳатто нисбати эътирози мардуми худаш барои таваққуфи ҷанг ва бозгардонидани асирон аз Ғазза бетаваҷҷуҳӣ мекунад.”
