Рӯзҳои 27 ва 28-уми апрели соли ҷорӣ, дар шаҳри Тулузи Фаронса қаҳрамонии куштии озоди Фаронса миёни наврасон ва ҷавонон баргузор гардид.
Дар ин мусобиқот Ҳузайфа Муҳаммадиқболиён, муҳоҷири тоҷики муқими Фаронса низ дар вазни 52 кг қувваозмоӣ кард.
Ҳузайфа дар даврҳои аввали мусобиқа се нафарро шикаст дода, дар даври ниҳоӣ ба ҳарифаш Пектас Алӣ дастболо шуд ва сазовори медали тиллову қаҳрамони куштии озоди Фаронса гашт.
Бояд гуфт, ин навҷавони тоҷик барои роҳхат гирифтан ба қаҳрамонии Фаронса дар мусобиқоти ноҳиявӣ низ бо шикаст додани чор нафар сазовори ҷойи якум гашта буд.
Ҳузайфа дар суҳбат бо Azda.tv гуфт, ки баъд аз пирӯзияш ба ӯ Федератсияи куштии Фаронса пешниҳод кардааст, ки шомили тими миллии Фаронса шавад ва дар мусобиқаҳои ҷаҳонӣ аз номи ин кишвар ширкат кунад.
Инчунин Ҳузайфа мегӯяд, ки ифтихор аз он дорад, ки номи худро ҳамчун як тоҷик назди фаронсавиҳо муаррифӣ кардааст.
Гуфта мешавад, Ҳузайфа, ки ҳамагӣ 17 сол дорад дорои дипломи доварии куштии озод аст.
Ҳузайфа, писари мудири пойгоҳи “Ислоҳ.нет” Муҳаммадиқболи Садриддин буда, ӯ соли 2016 ҳамроҳи оилааш ба Аврупо муҳоҷир шудааст ва ҳоло дар Фаронса зиндагӣ дорад.
