Раисҷумҳури Русия Владимир Путин ба Вазорати дифои кишвараш тамирини омодагӣ барои истифода аз силоҳҳои ҳастаиро иҷозат дод.
Тибқи иттилои дафтари матбуоти Вазорати дифои Русия, Владимир Путин ба ин ниҳод дастур дода, ки Ситоди генералии ҳарбӣ ба машқҳои истифодаи силоҳи ҳастаии ғайристратегӣ омода шавад.
Вазорати дифои Русия мегӯяд, дар ин тамринот воҳидҳои мушакии Ҳавзаи ҳарбии ҷанубӣ, авиатсия ва нерӯҳои баҳрии Русия ширкат мекунанд.
Дар иттилои Вазорати дифои Русия ҳадафи ин тамринот “омодагии ҳайати шахсӣ ва таҷҳизоти воҳидҳо барои истифодаи силоҳи ҳастаии ғайристратегӣ дар ҳолати вокуниш ва таъмини бечунучарои тамомияти арзӣ ва соҳибихтиёрии Русия” гуфта мешавад.
Русия ин размоиши худро “барои омодагӣ ва посух додан ба изҳороти иғвоангез ва таҳдидҳои кишварҳои ғарбӣ ба мукобили Русия” гуфтааст.
Рӯзи оғози размоиш маълум нашудааст, вале гуфта мешавад, дар рӯзҳои наздик оғоз мешавад. Бори охир чунин разсоиш дар Русия соли 1990 гузаронида шуда буд. Моҳи феврали соли 2023 Путин фармоне ба Вазорати дифои Русия дод, ки дар майдони размоишии “Замини Нав” барои озмоиши силоҳи ҳастаӣ омода бошад.
Мақомоти баландпояи Русия борҳо дар хитоб ба кишварҳои ғарбӣ ва Амрико гуфтаанд, ки кумакҳои низомии ин кишварҳо ба Украина боис шуда, ки Русия тасмими омодагӣ барои истифода аз аслиҳаи ҳастаиро бигирад.
Моҳи октябри соли 2022 Пажӯҳишгоҳи иқтисоди ҷаҳонӣ ва равобити байналмилалии Академияи илмҳои Русия дар як гузорише гуфт, “агар ҷанг бо Украина дар миқёси кунунӣ боқӣ монад, Маскав аз силоҳи ҳастаӣ истифода нахоҳад кард.” Аммо дар ин гузориш таъкид мешавад, ки хатари истифодаи воқеӣ аз силоҳи ҳастаӣ ва густариши он аз нуқтаи назари Маскав дар ҳоле вуҷуд дорад, ки “яке аз кишварҳои дорои силоҳи ҳастаӣ дар ин ҷанг мустақим дахолат кунад.”
Пас аз оғози ҳамлаҳои Русия ба Украина ва ҷорӣ шудани таҳримҳои шадид алайҳи мақомдорони рус ин бори чандум аст, ки танишҳои лафзӣ байни Русия ва кишварҳои узви НАТО барои таҳдид аз истифодаи силоҳи ҳастаӣ садо медиҳад.
