Вазорати мудофиаи Тоҷикистон хабар дод, ки нақшаи даъвати баҳории ҷалби сарбозон ба Артиш дар кишвар рӯзи 22-уми майи соли ҷорӣ 100% иҷро шуд.
Дар иттиллоияи Вазорати мудофиа Тоҷикистон гуфта мешавад, ки имсол нақшаи даъвати баҳории шаҳрвандон ба сафи Қувваҳои мусаллаҳи кишвар дар ҳама шаҳру ноҳияҳои ҷумҳурӣ пеш аз муҳлат ба анҷом расид.
Даъвати баҳории сарбозон ба Артиш аз 1-уми апрели соли ҷорӣ оғоз ёфта буд. Ба иттилои Вазорати мудофиа, пас аз оғози ин мавсим аввал Вилояти Мухтори Кӯҳистони Бадахшон ва баъдан ноҳияҳои шаҳри Душанбе, сипас вилояти Хатлону шаҳру ноҳияҳои тобеи ҷумҳурӣ ва дар охир вилояти Суғд нақшаи даъвати ҷавонписаронро пурра анҷом доданд.
Вазорати мудофиаи Тоҷикистон пеш аз муҳлат иҷро шудани нақшаи даъват дар ҷумҳуриро “зиёд будани шумораи шаҳрвандони ихтиёрӣ” ва натиҷаи “заҳмату фаҳмондадиҳӣ ва ҳисси масъулиятшиносии кормандони давлатӣ”, аз ҷумла маъмурони комиссариятҳои ҳарбӣ донистааст. Аммо воқеияти ҳол, ки ҷараёни сарбозгириро дар шабакаҳои иҷтимоӣ ба намоиш мегузорад, чизи дигар аст.
Ҳамасола пас аз оғози мавсими даъвати ҷавонон ба артиш хабарҳои зиёде аз рафти “сарбозшикор” дар шабакаҳои иҷтимоӣ нашр мешавад. Аз ҷумла, тибқи иттилои расонаҳо, 12-уми апрели соли равон як ҷавони 24-сола дар шаҳри Ваҳдат аз ошёнаи панҷум худро ба замин андохта, ҷон бохт, ки шоҳидон сабаби онро гурехтан аз “облава” гуфтаанд.
Дар баробари ин, ба гуфтаи бархе сокинони кишвар, мақомоти Тоҷикистон ҳоло услубҳои нави даъват ба артишро ёд гирифтаанд. Аз ҷумла, мақомот раисони маҳаллаҳо ва имомони масҷидҳоро таҳдид мекунанд, ки сарбозони даъватшударо пайдо намуда, ба дасти маъмурони ҳарбӣ бисупоранд, дар акси ҳол масҷидҳоро мебанданд.
Ҳамчунин дар шабакаҳои иҷтимоӣ корбарон аз он шикоят доранд, ки мақомот хонаҳои ҷавонон рафта, волидайни онҳоро маҷбур мекунанд фарзандашонро ҳарҷо бошад, пайдо кунанд ва агар писарашон пайдо нашавад, таҳдид мекунанд, ки барқи онҳоро хомӯш мекунанд.
