Раисҷумҳури Русия Владимир Путин 19 -уми инюи соли ҷорӣ бо сафари корӣ озими Кореяи Шимолӣ шуд. Дар ин бора расонаҳои давлатии Русия хабар доданд.
Гуфта мешавад, баъд аз 24 сол ин аввалин сафари Путин ба кишвари бастаи Кореяи Шимолӣ аст. Дар аксҳое, ки расонаҳои давлатии Русия нашр карданд, дида мешавад, Ким Чин Ун, расиҷумҳури Кореяи Шимолӣ барои истиқболи Владимир Путин дар фурӯдгоҳи Пхениян – пойтахти ин кишвар қарор дорад.
Ба иттилои расонаҳо, дар мулоқоти ҷонибҳо санадҳои муҳими ҳамкорӣ дар соҳаҳои иқтисод, тиҷорат, сиёсат ва ғара ба имзо расидааст. Путин дар ин дидор бо ишора “ба 70 сол муносибатҳо ва ҳамкориҳои ду кишвар бар асоси баробарӣ, эҳтироми дутарафа ва эътимод” ёд кард.
Влидимир Путин таъкид кад, ки ҳамкориҳои низомӣ ва технологиро бо Кореяи Шимолӣ тақвият мебахшад. Инчунин Путин дар хитоб ба Шӯрои амнияти Созмони Милали Муттаҳид гуфт, ки масъалаи таҳримҳо алайҳи Кореяи Шимолӣ бояд бознигарӣ шавад.
Ҳамзамон Ким Чин Ун дар мулоқот бо ҳамтои русаш аз тақвияти ҳамкориҳои стратегӣ гуфт ва сафари ӯро ҳодисаи муҳими таърихӣ хонд. Ӯ ҳамчунин аз амалиёти низомии Русия дар Украина ба таври комил пуштибонии худро эълон кард.
Солҳост Кореяи Шимолӣ мавриди таҳримҳои ҳамаҷониба қарор дорад. Амрико ва Кореяи Ҷанубӣ давлати Кореяи Шимолиро муттаҳам мекунанд, ки дар ивази дарёфти кумакҳои ғазоӣ ва технологияи навин аз Русия дар таъмини таҳҷизоти тупхонаӣ ва дигар тасҳилот ба ин кишвар кумак мекунад
Аммо Русия ва Кореия Шимолӣ кумакҳои таслиҳотиро иттиҳоми ҷаҳони Ғарб дониста, онро такзиб мекунанд.
Бархе нозирон бар ин боваранд, ки сафари Владимир Путин ба Кореяи Шимолӣ метавонад паёме ба Ғарб бошад, ки аз нигоҳи таъмини таслиҳотӣ ва идомаи ҷанг дар Украина ба мушкиле рӯбарӯ нахоҳад шуд.
