Суҳроби Зафар, раҳбари Ҳаракати сиёсии “Гурӯҳи 24” дар яке аз зиндонҳои шаҳри Душанбе қарор дорад. Дар ин бора Додоҷон Атовуллоев, рӯзноманигор ва раҳбари созмони “Ватандор” дар саҳфаи фейсбукиаш хабар дод.
Бино ба навиштаи Атовуллоев, раҳбари “Гурӯҳи 24” Суҳроби Зафар баъди рабуда шудан аз Туркия дар боздоштгоҳи КДАМ – дар дохили зиндони ба ном “Кирпичний” нигоҳ дошта мешавад ва яке аз пайвандонаш, ки бо Суҳроб вохӯрдаст, гуфтааст, ки вазъаш “хуб” аст.
То ҳол мақомоти Тоҷикистон дар боздоштгоҳ будани Суҳроби Зафарро тасдиқ ё рад накардааст, инчунин назари намояндагони “Гурӯҳи 24” дар ин бора дастрас нест.
Пештар аз ин низ пойгоҳи хабарии “Бомдод” дар истинод ба манобеаш аз мақомоти Тоҷикистон хабар дода буд, ки Суҳроби Зафар, раҳбари “Гурӯҳи 24”-ро 15-уми марти соли 2024 бо парвози ширкати ҳавопаймоии “Сомон Эйр” аз Истанбул ба Душанбе оварда буданд.
Он замон Ҳаракати сиёсии “Гурӯҳи 24” бо нашри изҳороте гуфта буд, ки ҳамагуна ахбори вобаста ба истирдоди ғайриқонунии раҳбарашон Суҳроби Зафар ва намонядаи ин ҳаракат дар Туркия Насимҷон Шариповро тасдиқ ва ё рад намекунад, зеро ягон хабари дақиқ аз манобеи расмӣ ба даст наовардааст.
Ёдовар мешавем, ки ҳамагуна тамос бо Суҳроб Зафар, раҳбари Ҳаракати сиёсии “Гурӯҳи 24” аз 10-уми марти соли ҷорӣ ба ин тараф ва тамосҳо бо Насим Шарипов, намояндаи ин гурӯҳ дар Туркия аз 23-уми феврали соли ҷорӣ ба ин сӯ қатъ шудааст. Ҳардуи онҳо дар Туркия – кишваре, ки соли 2015 раҳбари ин гурӯҳ Умаралӣ Қувватов ба қатл расида буд, беному нишон гаштаанд.
Гуфта мешавад, фаъолон ва аъзои “Гурӯҳи 24” барои пайдо кардан ва озодии Суҳроби Зафар ва Насиҷон Шарипов дар назди бинои сафорат ва консулгарии Туркия дар кишварҳои Олмону Утриш ва Фаронсаву Ҳолланд тазоҳурот баргузор карда буданд.
