Академияи миллии илмҳои Тоҷикистон боздошти раиси собиқи Шӯрои олии кишвар Акбаршоҳ Искандаровро тасдиқ кард.
Дар ин бора Нозим Маҳмадизода, раиси Пажӯҳишгоҳи фалсафа, сиёсатшиносӣ ва ҳуқуқи ин Академия рӯзи 1-уми август зимни нишасти хабарӣ ба хабарнигорон иттилоъ дод.
Ба гуфтаи Маҳмадизода, ин сиёсатмадори шинохта ду моҳ пеш дастгир шудааст ва бо сабаби муҳри махфӣ доштани парванда, ҷузъиёти қазияи Искандаровро намедонад.
Гуфта мешавад, Акбаршоҳ Искандаров то замони боздошт мудири Шуъбаи масоили сиёсӣ ва байналмилалии Пажӯҳишгоҳи фалсафа буд ва раиси ин Пажӯҳишгоҳ ба ҷойи кумак ба кормандаш гуфтааст, ки талош мекунанд ба рафти тафтиши парвандаи ҷиноӣ халал нарасонанд.
Ёдовар мешавем, ки Акбаршоҳ Искандаров дар пасманзари боздошту бозупурсии вакили порлумон ва собиқ раиси Ҳизби демократи Тоҷикистон Саидҷаъфар Усмонзода ва вазири собиқи корҳои хориҷӣ Ҳамроҳхон Зарифӣ дастгир шудааст.
Инчунин пас аз ӯ расонаҳо аз боздошти муовини раиси Ҳизби демократ Аҳмадшоҳ Комилзода ва ҳуқуқдони шинохтаву муовини раиси Ҳизби сотсиал-демократ Шокирҷон Ҳакимов хабар доданд.
То ҳол мақомот сабаби боздошти ин чеҳраҳои шинохта дар кишварро ба ҷуз қазияи Саидҷаъфар Усмонзода шаҳр надодааст.
Аммо коршиносон бар ин боваранд, ки боздошти ин афрод ба парвандаи Усмонзода рабт дорад, чун Додситони кулли кишвар Юсуф Раҳмон вақте аз парлумон бекор кардани дахлнопазирии вакилии ӯро дархост мекард, гуфта буд, ки парвандаи ҷиноятӣ бо иттиҳоми “ғасби ҳокимият” ба зидди Саидҷаъфар Усмонзода ва “дигарон” кушода шудааст.
Ҳоло мақомоти Тоҷикистон ҳисобҳои бонкии Саидҷаъфар Усмонзода, Акбаршоҳ Искандаров, Ҳамроҳхон Зарифӣ, Аҳмадшоҳ Комилзода ва Шокирҷон Ҳакимовро баста, дар баробари фишор наздиконашон ҳаққи фурӯхтан ё ба иҷора додани хона, бӯстонсаро, ширкат, мошин ва амволи дигарро надоранд.
