Мақомоти Русия як шаҳрванди Тоҷикистонро бо вуҷуди доштани иқомаи доимӣ ихроҷ ва ворид шудани ӯро ба ин кишвар барои ҳамеша манъ кардаанд.
Хабаргузории “Настоящее Время” ба нақл аз мақомоти қудратии Русия менависад, ки ин зодаи Тоҷикистон то вақте зинда ҳаст, наметавонад дигарбора ба хоки ин кишвар ворид шавад.
Вай дар суҳбат бо хабарнигорон таъкид карда, ки марзбонони Русия бо вуҷуди доштани иҷозати иқомати доимӣ (ВНЖ), издивоҷ бо шаҳрванди Русия ва доштани чор фарзанд бо ҳамсараш, ӯро бидуни ҳеч далели қонеъкунандае аз ин кишвар ихроҷ кардаанд. Марзбонони Русия ба вай гуфтаанд, ки “беҳтараш даҳонатро банд ва дигар дар ин бораи суҳбат накун!”
Ин шаҳрванди Тоҷикистон бо нигаронӣ дар бораи сарнавишти зану фарзандонаш дар суҳбатҳои видеоии худ мегӯяд, ки ҳеҷ кас дар мақомоти Русия ба ӯ шарҳ надод, ки чаро чунин қароре дар бораи ихроҷ ва манъи вуруди ӯ ба Русия қабул шудааст.
Ин мард мегӯяд, мақомоти Русия ӯро ҳангоми бозгашт аз Тоҷикистон дар яке аз фурӯдгоҳҳои шаҳри Маскав боздошт карданд ва ба муддати як шабонарӯз дар толори интизорӣ нигоҳ доштанд. Ва ҳамонҷо телефонҳои ӯро тафтиш карда, изи ангуштонашро ҳам гирифтанд ва барои ташхиси бемориҳо аз даҳонаш ҳам “тест” гирифтанд. Дар ниҳоят, пас аз чанд соати интизорӣ, ба ӯ хабар доданд, ки барои ҳамеша аз ин кишвар ихроҷ мешавад.
Вай ҳатто ҳангоми кӯшиши навбатӣ барои ворид шудан ба Русия аз тариқи Баларус ва шаҳри Қазон низ ба ӯ гуфтаанд, ки наметавонад ба қаламрави ин кишвар ворид шавад. Мақомоти марзбонӣ ҳукми ихроҷи ӯро ба дасташ дода, таъкид кардаанд, ки сабабҳои содир шудани ин қарорро бо роҳҳои қонунӣ пайгирӣ кунад. Аммо кӯшишҳои ҳал кардани ин масъала тавассути адвокат низ натиҷае надодааст.
Гуфта мешавад, қаблан ҳам бе далили воқеӣ ихроҷ кардани шаҳрвандони Тоҷикистон аз қаламрави Русия вуҷуд дошт, вале пас аз оғози ҳамлаҳои Русия ба хоки Украина дар соли 2022 ин раванд шиддат гирифт ва ҳоло бо андактарин баҳона муҳоҷиронро ихроҷ мекунанд.
