Мақомоти исроилӣ гуфтанд, ки нерӯҳои артиши ин кишвар барои анҷоми як амалиёти маҳдуд вориди хоки Лубнон шудаанд, аммо “Ҳизбуллоҳ”-и Лубнон ин иддаоро рад мекунад.
Мақомоти исроилӣ имрӯз, 1-уми октябр ба расонаҳо гуфтаанд, ки нерӯҳои артиши ин кишвар “амалиёти маҳдуд ва ҳадафманд”-еро дар ҷануби Лубнон оғоз кардаанд.
Аммо “Ҳизбуллоҳ”-и Лубнон, ки аз 8-уми октябри соли 2023 то кунун дар ҳимоят аз мардуми Фаластин дар Ғазза ва Каронаи Бохтарии рӯди Урдун ҳамалоти худро оғоз карда буд, мегӯяд, ҳеч як аз нерӯҳои артиши Исроил вориди хоки Лубнон нашудааст.
Артиши Исроил, ки тайи чанд рӯзи ахир ҳамалоти сангини худро алайҳи Лубнон оғоз кардааст, даъво дорад, ки бо террор кардани аксари раҳбарони гурӯҳи “Ҳизбуллоҳ” зерсохторҳои онро ҳам тахриб ва тазъиф кардааст.
Аммо ҳамалоти сангин ва мушакии имрӯз “Ҳизбуллоҳ” алайҳи Исроил нишон дод, ки бо вуҷуди ин ҳама террорҳо ҳамоно хеле аз зерсохторҳои ин гурӯҳ побарҷо буда, тавони онро дорад, ки дар майдони набардҳо ҳарфи худашро бигӯяд.
Аз сӯи дигар, Нерӯҳои посдори сулҳи Созмони Милали Муттаҳид, ки дар ҷануби Лубнон, дар марзҳои ин кишвар бо Исроил қарор доранд, бо нашри баёнияе гуфтааст, ки “ҳар гуна убур аз марзи Лубнон нақзи ҳокимият ва тамомияти арзии ин кишвар ва нақзи Қатъномаи 1701 -и Шӯрои амнияти Созмони Милали Муттаҳид мебошад”.
Шӯрои амнияти Созмони Милали Муттаҳид пас аз даргириҳои 33-рӯза байни Исроил ва “Ҳизбуллоҳ” дар соли 2006 хостори ақабнишии комили Исроил аз ҷануби Лубнон шуда буд.
Гуфта мешавад, ихтилофоти Исроил бо ҳамсояҳояш даҳсолаҳо инҷониб идома дорад. Исроил минтақаҳое аз Фаластин, Лубнон, Сурияро ғасб карда, шаҳраксозиҳои худро идома додааст. Созмони Милали Муттаҳид ҳам дар моҳи сентябри соли ҷорӣ бо қабули Қатъномае аз Исроил хоста буд, ки дар муддати 12 моҳ тамоми сарзаминҳои ғасбкардаашро дар Фаластин баргардонад.
