Маъмурони муҳоҷирати Амрико як шаҳрванди Тоҷикистонро, пас аз раҳо шудан аз боздошт дар Филаделфия дастгир карданд.
Тибқи иттилои Идораи муҳоҷират ва ихроҷ дар Филаделфия, Юсуф Сидиқовро рӯзи 3-уми сентябри соли ҷорӣ, дар Бенсалеми иёлати Пенсилвания боздошт кардаанд.
Пулиси Филаделфия Сидиқовро қаблан, рӯзи 13-уми август соли ҷорӣ, бо иттиҳомҳо дуздӣ, вуруди ғайриқонунӣ ба моликияти дигарон, дарёфти моли дуздидашуда ва осеб расондан ба амвол дастгир карда буд.
Дар иттилоия иддао мешавад, ки мақомоти муҳоҷират аз масъулони маҳаллӣ хоста буданд, пеш аз раҳо кардани ӯ хабар диҳанд. Аммо, ба гуфтаи ин ниҳод, дархост иҷро нашуда ва Сидиқов озод шудааст. Баъдан маъмурони муҳоҷират ӯро дар Бенсалем пайдо ва дубора боздошт кардаанд.
Ҳоло Сидиқов дар боздошт қарор дорад ва мунтазири баррасии парвандаи муҳоҷиратии худ аст. Дар маълумоти нашршуда шарҳи худи ӯ ё вакилаш ва мавқеи мақомоти Филаделфия оварда нашудааст.
Бояд гуфт, иттиҳомҳои зикршуда ҳанӯз маънои исбот шудани гуноҳи ӯро надоранд.
