Сардори милисаи ҷамоати Ромити шаҳри Ваҳдат аз ҷониби маъмурони Додситонии кулли Тоҷикистон боздошт шудааст.
Тавре Радиои Озодӣ аз манобеи худ хабар медиҳад, Фирдавс Кабутов, сардори Шуъбаи милисаи ҷамоати Ромит бо иттиҳоми “таҷовуз ба номуси духтари ноболиғ” гумонбар мешавад. Аммо то ҳол Вазорати корҳои дохилӣ ва ё Додситонии кулли кишвар боздошти ӯро расман шарҳ надодаанд.
Ин расона тибқи иттилои манобеаш менависад, ки Фирдавс Кабутов дар ҳафтаи аввали моҳи октябр боздошт шудааст. Ва “Ӯ ҳоло дар Боздоштгоҳ аст ва нисбаташ бо гумони “таҷовузи такрорӣ нисбат ба духтари ноболиғ” (моддаи 138, қисми 2, банди “д”-и Кодекси ҷиноӣ) парванда боз шудааст”.
Моддаи мазкур барои шахсе, ки ҷинояташ дар додгоҳ собит шавад, аз 7 то 12 соли зиндон ва инчунин якумра маҳрум сохтан аз ҳуқуқи ишғоли мансабҳои муайянро пешбинӣ мекунад.
Инчунин манобеъ афзудаанд, ки духтаре, ки аз ҷониби сардори пулиси Ромит таҷовуз шудааст 17-сола буда, Кабутов бо ӯ дар шаҳри Душанбе чунин кардааст. Худи духтар “ба додситонӣ шикоят кардааст, ки Фирдавс Кабутов ӯро бо таҳдид аз 16-солагӣ таҷовуз мекард.”
Вобаста ба қазияи мазкур назари худи сардори пулис маълум нест, аммо як хеши Кабутов гуфта, ки ин кор дар ҳаққи ӯ туҳмат аст ва худи духтар бо Фирдавс Кабутов тамос дошта ва синни воеқиашро пинҳон доштааст. “Ин нафар иддао карда, ки гӯё духтар аз Кабутов пул хоста, бо шунидани ҷавоби рад ба зидди ӯ ба додситонӣ шикоят кардааст.”
Ҳамчунин назари духтар ва пайвандонаш дар ин бора дастраси расонаҳо нест. “Вале афроде, ки аз қазия хабар доранд, мегӯянд, ҷабрдида ба додситонӣ гуфтааст, беш аз як сол Кабутов ӯро тарсондааст, то ба касе шикоят накунад.”
