Вакилони парлумони Русия бо тарҳи қонуне мегӯянд, муҳоҷирони корӣ бояд аз муассисаҳои таълимӣ дуртар зиндагӣ кунанд.
Гурӯҳе аз вакилони Думаи давлатӣ аз фраксияи Ҳизби либерал-демократии Русия (ЛДПР) тарҳи қонунеро пешниҳод карданд, ки тибқи он зиндагии муҳоҷирони корӣ дар масофаи камтар аз 200 метр аз муассисаҳои таълимӣ, манъ хоҳад шуд.
Леонид Слутский, раиси ЛДПР ва вакили парлумон мегӯяд, ки ин қонун дар баробари манъи зиндагии муҳоҷирони корӣ дар наздикии мактабҳо ва кӯдакистонҳо, инчунин бақайдгирии онҳоро дар биноҳое, ки дар он кӯдакон қарор доранд, комилан манъ мекунад.
Слутский низ иддао карда, ки қонунгузории феълии Русия ҷойгиркунии муҳоҷиронро танзим намекунад ва аксар вақт муҳоҷирон дар наздикии муассисаҳои таълимӣ ё ҳатто дар дохили онҳо ҳангоми иҷрои корҳои таъмирӣ зиндагӣ мекунанд, ки ин метавонад барои ноболиғон хатар эҷод кунад.
Муаллифони ин тарҳи қонун бо мисол овардани бинои кӯдакистон дар шаҳри Перм, ки ба хобгоҳ табдил гашта буд, мегӯянд, ки дар баъзе ҳолатҳо биноҳои таълимӣ барои истиқомат иҷора дода мешаванд, гарчанде, ки мақоми расмии онҳо дар ҳуҷҷатҳо ҳамчун муассисаи таълимӣ боқӣ мондааст.
Гуфта мешавад, пас аз ҳодисаи хунини “Крокус Сити Ҳолл”-и Русия, мақомоти ин кишвар барои сахттар намудани сиёсати муҳоҷират чандидн қонунҳои наверо баррасӣ ва қабул кардааст. Ҳатто кори муҳоҷирон бо баҳонаи амниятӣ дар баъзе соҳаҳо, аз ҷумла таксиронӣ дар аксар минтақаҳои ин кишвар манъ шуда, нархи иҷозатномаи корӣ ҳам гарон шудааст.
Инчунин аз моҳи феврали соли 2025 қонуне мавриди амал қарор мегирад, ки ихроҷи муҳоҷиронро аз Русия соддатар мегардонад ва ҳамзамон рӯйхати шахсони таҳти назорат таъсис дода мешавад, ки дар он шаҳрвандони хориҷии қонуншикан сабт мегарданд.
Дар баробари ин ҳама мушкилот муҳоҷирон дар Русия мавриди тафтиш ё рейдҳои зиёде қарор гирифта, ба онҳо пешниҳод мешавад, ки бо Вазорати мудофиаи Русия шартнома барои иштирок дар амалиётҳои ҷангӣ дар қаламрави Украина имзо кунанд. Онҳое, ки аз имзои шартнома саркашӣ мекунанд, бо хатари ихроҷ ба кишварҳояшон, рӯ ба рӯ мешаванд.
Ҳатто онҳое, ки пештар шаҳрвандии Русияро ба даст оварда буданд ва пас аз гирифтани шаҳрвандии ин кишвар худро дар артиш сабти ном намекунд ё аз хидмати сарбозӣ саркашӣ мекунад, шиносномаи Русияшон бекор карда мешавад.
