Вазорати корҳои дохилии Тоҷикистон бо нашри як иттилоия аз тоҷирони кишвар хост, ки аз хариду фурӯши маводҳои тарфгарӣ худдорӣ кунанд.
Бино ба иттилои расмӣ, имрӯз, 9-уми декбари соли 2024, Вазорати корҳои дохилии Тоҷикистон бо нашри як иттилоия ба сокинони кишвар ҳушдор дод, ки аз ҳаргуна хариду фурӯш ва паҳн кардани маводҳои тарфгарӣ (хлопушка) худдорӣ намоянд.
Вазорати корҳои дохилии Тоҷикистон бо нашри ин ҳушдори худ дар шабкаҳои иҷтимоӣ гуфтааст, ки тибқи талоботи қонунгузории кишвар ҳамагуна хариду фурӯш ва паҳн кардани маводҳои тарфгарӣ манъ буда, омилони он ба ҷавобгарӣ кашида мешаванд.
Дар матни иттилоияи ВКД, ки дар сомона ва саҳфаҳои ин вазорат дар шабакаҳои иҷтимоӣ нашр шудааст, омада, ки Вазорати корҳои дохилӣ “аз шаҳрвандон қатъиян талаб менамояд, ки аз фурӯшу паҳнсозӣ ва истифодабарии маводҳои тарфгарӣ худдорӣ намоянд!”
Гуфта мешавад, тибқи қонунгузории Тоҷикистон омилони хариду фурӯш ва касоне, ки ба паҳн кардани чунин маводҳои пиратехникӣ машғул мешаванд, ҷарима дар ҳаҷми аз 7 ҳазору 200 сомонӣ то 36 ҳазор сомонӣ ва ҷазо дар ҳаҷми аз як то ду сол пешбинӣ шудааст.
Ҷолиб он аст, ки мақоми қонунгузор ҳамагуна хариду фурӯш ва паҳн кардани маводҳои тарфгариро ба сокинону шаҳрвандон дар дохили кишвар манъ кардааст, вале худи ҳукуматдорон дар аксар маврид ва бахусус ҳангоми ҷашн гирифтани хеле аз маъракаҳои ҳукуматӣ ва идҳои расмӣ, аз ҷумла Соли нави мелодӣ то қадри тавон дар ҳама шаҳру ноҳияҳо аз чунин маводҳои тарфгарӣ истифода мекунанд.
