Муҳаммадсобири Абдуқаҳҳор, раҳбари Дастгоҳи иҷроияи Ҳаракати сиёсии “Гурӯҳи 24” аз фишори мақомот болои пайвандонаш дар ноҳияи Рашт хабар дод.
Ба гуфтаи Муҳаммадсобир, ҳадафи мақомот маҷбур кардани ӯ барои даст кашидан аз фаъолияти сиёсӣ ва бозгашт ба Ватан мебошад.
Рӯзи сешанбе, 17-уми декабр ӯ дар суҳбат бо Azda.tv гуфт, ки фишорҳо аз соли 2014 инҷониб болои хонаводааш идома дорад ва ин чанд ҳафта охир сахттар шуда, ҳафтаи гузашта кормандони ШВКД дар ноҳияи Рашт ба хонаи волидонаш рафта, таҳдид кардаанд, ки ӯро ба бахшиш пурсидану бозгашт ба Тоҷикистон водор кунанд.
“Чанд маротиба аст, ки ба хонаводаи мо фишор меоранд. Падару модари ман ҷавобгӯ дар амалҳои ман нестанд. Мақомот мегӯянд, агар барнагардам маро ду роҳ интизор аст: Ё мисли Умаралӣ Қувватов қатл мешавам ё мисли Суҳроб Зафар ба Тоҷикистон бурда, ҳукми сангин медиҳанд.” – мегӯяд раҳбари Дастгоҳи иҷроияи “Гурӯҳи 24”.
Аммо Муҳаммадсобири Абдуқаҳҳор, ки аз соли 2012 аз Тоҷикистон ҳиҷрат кардааст мегӯяд, ки гуноҳе накардаасту моли касеро надуздидааст ва ба миллат хиёнат накардааст,ки узрхоҳӣ кунад.
“Аввалан ман гуноҳе накардаам, вале агар мақомот бо факту далел тавонанд, ягон “гуноҳ”-и маро ошкор кунанд, омадаам аз миллатам бахшиш пурсам, на аз Раҳмонов”- таъкид кард ин фаъоли сиёсӣ.
Муҳаммадсобир мегӯяд, ки ин фишору таҳдидҳо гувоҳи он аст, ки дар роҳи ҳақ аст ва вақте роҳи мубориза бар зулмро интихоб кард медонист, ки ду роҳ дорад – пирӯзӣ ё зиндону қатл.
Инчунин раҳбари Дастгоҳи иҷроияи “Гурӯҳи 24” таъкид кард, ки ба ваъдаи мақомот бовар надорад, чун мақомот ба бародари ӯ, ки коре ба сиёсат надорад аз соли 2014 инҷониб иҷоза намедиҳанд, ки аз кишвар барои ёфтани ризқу рузӣ ба хориҷ равад.
Гуфта мешавад, мақомот дар соли 2014 ба Кодекси ҷиноятии Тоҷикистон тағйирот ворид карданд, ки тибқи он шахсони муттаҳам ба экстремизм агар бо ихтиёри худ ба Ватан баргарданд ва сидқан тавба кунанд, метавонанд аз ҷавобгарии ҷиноятӣ озод шаванд. Аммо на дар ҳама ҳолат ин қонун риоят мешавад ва онҳое, ки бо хоҳиши худ ба Ватан бармегарданд, зиндонӣ мешаванд ё ҳамеша зери фишор қарор хоҳанд гирифт.
Пештар аз ин фаъолон ва мухолифони тоҷик аз афзоиши фишори мақомоти Тоҷикистон болои хонаводаҳояшон шикоят карда буданд. Вале мақомот ҳечгоҳ сабаби чунин рафторашонро бо хонаводаҳои мухолифон расман шарҳ намедиҳанд. Инчунин хонаводаҳои мухолифонро таҳдид мекунанд дар ин бора бо расонаҳо суҳбат накунанд.
