Кумитаи дифоъ аз ҳуқуқи рӯзноманигорон (CPJ) 13-уми январ бо нашри изҳороте озодии бешарту қайди Адҳам Иброҳим ва 7 рӯзноманигорои дигарро аз мақомоти тоҷик талаб кард.
Гулноза Саид, ҳамоҳангсози барномаи CPJ оид ба Аврупо ва Осиёи Марказӣ мегӯяд: “Бо он ки мақомоти Тоҷикистон дар тӯли даҳ соли охир матбуоти мустақилро комилан аз байн бурданд, ҳукми сангин ба Аҳмад Иброҳим нишон медиҳад, ки онҳо барои аз байн бурдани гузоришҳои интиқодӣ чӣ қадар талош хоҳанд кард.”
Дар гузориши CPJ таъкид мешавад, ки “Мақомоти Тоҷикистон бояд Аҳмад Иброҳим ва ҳафт рӯзноманигори дигарро, ки бо иттиҳомоти сохта ба муддатҳои тӯлонӣ маҳкум ба зиндон шудаанд, фавран озод кунанд ва муҳити саркӯбкунандаи расонаҳои кишварро ислоҳ кунанд.”
Кумитаи дифоъ аз ҳуқуқи рӯзноманигорон боздошти сардабири “Пайк”-ро интиқоми мақомот аз ӯ ва пеши роҳи интиқодро гирифтан медонад. Зеро, ба гуфтаи ин ниҳоди ҳуқуқӣ, Аҳмад Иброҳим қаблан аз фишори мақомоти маҳаллӣ барои навиштани мақолаҳои интиқодияш шикоят карда буд.
Ёдовар мешавем, ки Додгоҳи шаҳри Кӯлоб сардабири ҳафтаномаи “Пайк” Аҳмади Иброҳимро рӯзи 10-уми январи соли ҷорӣ ба 10 соли зиндон маҳкум кард. Ӯ моҳи августи соли 2024 дастгир гардид ва бо иттиҳомоти “ришвадиҳӣ ба маъмури Кумитаи давлатии амнияти миллӣ”, “тамаъҷӯӣ” ва “ифротгароӣ” гунаҳкор дониста шуд.
Аҳмади Иброҳим як рӯз қабл аз эълони ҳукм дар номае ба Рустами Эмомалӣ ҳама иттиҳомотро рад карда гуфта буд: “дар умрам ба касе пора надодаам, вале маро ба порадиҳӣ айбдор мекунанд. Дар умрам тамаъҷӯӣ накардаам, аммо маро ба тамаъҷӯӣ айбдор доранд. Дар умрам ифротгаро набудам, балки тӯли 22 соли охир ба ифротгароӣ мубориза бурдам. Чӣ гуна мани рӯзноманигор ва нависандаи 6 роман дар васфи зардуштиён салафӣ мешавам?”.
Аммо бо вуҷуди ин Додгоҳи шаҳри Кӯлоб 10-уми январ ин рӯзноманигори 63-соларо барои даҳ сол равонаи зиндон кард. Ҳукме, ки пайвандони рӯзноманигор онро қабул надоранд ва бераҳмона медонанд.
