Дар соли 2024 танҳо аз шаҳри Санкт-Петербурги Русия зиёда аз 8 ҳазор муҳоҷир ихроҷ шудаанд.
Тибқи оморҳои мақомот, аз шумори ихрҷошудаҳо 10,5% занон буда, аксарашон шаҳрвандони Узбекистон ва Тоҷикистон мебошанд.
Мақомоти Русия муҳоҷирони ихроҷшударо “ғайриқонунӣ” номида, иддао мекунанд, ки ҳамаи ин афрод қоидаҳои муҳоҷиратро вайрон карданд.
Инчунин аз аввали соли ҷорӣ додгоҳҳои Санкт-Петербург 248 муҳоҷирро тибқи моддаи 18.8 Кодекси ҳуқуқвайронкунии маъмурии Федератсияи Русия барои вайрон кардани қоидаҳои вуруд ё истиқомат дар ҳудуди Русия ба ҷавобгарии маъмурӣ кашида, ихроҷ кардаанд. Гуфта мешавад, ин афрод дар давоми панҷ соли оянда наметавонанд вориди хоки Русия шаванд.
Гуфта мешавад, танҳо дар соли 2024 бо қарори додгоҳҳои Русия беш аз 80 ҳазор муҳоҷир барои вайрон кардани қонунгузории муҳоҷират аз хоки Русия ихроҷ шуданд, ки беш аз 23 ҳазор нафарашон ба Москав ва вилояти Москав рост меояд.
Ин дар ҳолест, ки дар соли 2023 аз Русия 44,2 ҳазор ва дар соли 2022 – 26,6 ҳазор муҳоҷир ихроҷ шуда буданд.
Мақомоти Русия иддао доранд, ки сабаби асосии ихроҷи ин афрод вайрон кардани қоидаҳои вуруд ё будубош дар ин кишвар мебошад ва муҳоҷирони рондашуда то панҷ сол ҳаққи баргаштан ба Русияро надоранд.
Дар баробари иддаои мақомот, ки мегӯянд, сабаби асосии ихроҷи ин афрод вайрон кардани қоидаҳои вуруд ё будубош аст, хабарҳое нашр шуда буданд, ки муҳоҷирон бо вуҷуди доштани ҳамма ҳуҷҷатҳои лозима ва бидуни ҳеч қонуншикание низ аз Русия ихроҷ шуданд ва ҳатто баъзе афрод якумра ҳаққи вуруд ба хоки ин кишварро дигар надоранд.
Назорат болои муҳоҷирин ва ихроҷи онҳо дар Русия баъд аз ҳодисаи хунин “Крокус Сити Холл”, ки гумонбарони он шаҳрвандони Тоҷикистон мебошанд, шиддат гирифт. Пас аз ин ҳодиса чораҳои назоратӣ сахттар шуда, маҳдудиятҳои нав дар бораи фаъолияти кории муҳоҷирон дар аксар минтақаҳои Русия ҷорӣ карда шуданд.
Инчунин аз 5-уми феврали соли 2025 қонуни наве мавриди амал қарор мегирад, ки ба Вазорати корҳои дохилӣ иҷозат медиҳад муҳоҷиронро бе қарори додгоҳ аз кишвар хориҷ кунад. Дар ин ҳолат интизор меравад, шумори муҳоҷирони рондашуда аз ин кишвар бештар хоҳад шуд.
