Кормандони КДАМ дар ноҳияи Шамсуддин Шоҳин баъд аз як шабонарӯзи боздошту бозпурсӣ, пирамарди 85-сола Сафармад Ҳасановро озод карданд.
Раҳматулло Ҳасанов, узви Ҷунбиши ислоҳот ва рушди Тоҷикистон ва фарзанди ин пирамард 7-уми феврали соли ҷорӣ дар суҳбат бо Azda.tv ин хабарро тасдиқ кард.
Ба гуфтаи Ҳасанов, кормандони мақомот дар баробари падари 85-солааш ҳудуди 20 нафар аз пайвандонашро бо шумули кӯдакон, ки хурдатаринаш 2,5 моҳа ва бузургашон 16-сола будааст, субҳи 6-уми феврал соати 8:30 боздошт намуда, ба шуъбаи КДАМ дар ноҳияи Шамсуддин Шоҳин воқеъ дар деҳаи Сафедчашма, бурдаанд.
Ин афрод баъд як шабонарӯзи бозпурсӣ ба озодӣ баромадаанд. Маълум нест аз онҳо чӣ пурсида шудааст ва ин пирамарду занону кӯдакон дар чӣ шароите қарор доштанд.
Сафармад Ҳасанов падари яке кушташудаҳо дар зиндони шаҳри Ваҳдат мебошад. Писари ӯ Суҳроб Ҳасанов ҳамроҳи чанд зиндонии дигар 2-уми феврали 2025, дар ҷараёни “ошӯб” дар зиндони шаҳри Ваҳдат ба таври ваҳшиёна аз ҷониби маъмурони амниятӣ кушта шуд.
Гуфта мешавад, кормандони зиндон ҷасади зиндониҳои кушташударо бидуни иштироки хонаводаҳояшон шабона ва дар ҷои номаълум ба хок сипурда буданд.
Як фарзанди дигари ин пирамарди 85-сола бо номи Рустам, ки бо ҳукми 5-сола дар ҳамон зиндон нигаҳдорӣ мешуд, бе ному нишон гаштааст ва хонаводааш то ҳол хабаре аз вазъи ӯ надоранд.
Фаъоли сиёсӣ Раҳматулло Ҳасанов дар суҳбат бо Azda.tv аз он нигаронӣ кард, ки эҳтимол бародари дигараш низ кушта шуда бошад, чун ӯ дар як зиндон бо Суҳроб қарор дошт ва сару садоҳое ҳаст, ки дар як қабр ду нафарро, яъне Суҳробро бо нафари дигар ба хок сипурдаанд.
Раҳматулло Ҳасанов мегӯяд бародараш барои фаъолиятҳои ӯ ва танҳо барои интиқоди худ алайҳи режими Раҳмон, ки онро назди ҳамсинфонаш баён карда буд, зиндонӣ ва сипас ба қатл расонда шуд ва ҳеҷ иртиботе бо гурӯҳҳои террористӣ надошт.
Инчунин ӯ аз ҷомеаи ҷаҳонӣ, созмонҳои ҳуқуқи инсон ва корпусҳои дипломатӣ талаб дорад, ки ба ин ҷиноятҳои зиддиинсонӣ бетафовут набошанд ва режими Раҳмоновро барои нақзи ҳуқуқи инсон ва қатлҳои ваҳшиёна ба ҷавобгарӣ кашанд.
