Раисҷумҳури Амрико дар раванди иқдомҳои худ алайҳи Додгоҳи байналмилалии ҷиноӣ, ки ахиран ҳукми боздошти нахуствазири Исроил ва вазири ҷанги онро содир карда буд, таҳрим эълон кард.
Имрӯз, 7-уми феврали соли 2025, Додгоҳи байналмилалии ҷиноӣ ин иқдоми Доналд Тропм, раисҷумҳури Амрикоро маҳкум карда, аз кишварҳо ва созмонҳои ҷаҳонӣ хостааст, ки ба хотири таъмини адолати ҷаҳонӣ ин иқдомро маҳкум кунанд.
Доналд Трамп гуфтааст, ки кишвараш ба ҳар гуна иҷрои ҳукм ва чораҳое, ки Додгоҳи байналмилалии ҷиноӣ алайҳи Исироил содир мекунад, бе шакку шубҳа мухолифат карда, ҳамзамон аз ҳампаймонони худ интизор дорад, ки иҷрои чунин ҳукмҳоро нодида бигиранд.
Ӯ мегӯяд, таҳримҳои ҷадид на танҳо алайҳи кормандони зидахли Додгоҳи байналмилалии ҷиноӣ содир шуда, балки ин таҳримҳо ба ҳар фарде, ки дар раванди содир шудани ҳукмҳои ин Додгоҳ алайҳи афрод ва ё раҳбарони Амрико ва Исроил кумак кардаанд, шомил мешаванд.
Нахуствазири Исроил Бенёмин Нетанёҳу, ки ин рӯзҳо дар Амрико қарор дорад, аз ин иқдом истиқбол карда, Додгоҳи байналмилалии ҷиноиро, ки баъд аз Ҷанги ҷаҳонии дувум ба хотири ҳимоят аз яҳудиён ва муҷозоти касоне, ки алайҳи онҳо ҷиноят содир кардаанд, ташкил шудааст, онро ба яҳудиситезӣ муттаҳам кард.
Гуфта мешавад, Парлумони Аврупо, Иттиҳоди Аврупо кишвари Ҳоланд ва хеле дигар аз раҳбарони кишварҳо ва созмонҳои байналмилалии ҳомии ҳуқуқи башар ва фаъолони сиёсӣ ҷорӣ кардани таҳримҳо аз сӯи Амрико алайҳи Додгоҳи байналмилалии ҷиноиро маҳкум карда, гуфтаанд, ки ин иқдом адолати байналмилалиро ба хатар мувоҷеҳ мекунад.
