Дар амалиёти вежаи мақомоти амниятии Русия се муҳоҷири тоҷик дар шаҳри Псков кушта шуданд.
Тавре Радиои Озодӣ хабар дод, ҳафтаи гузашта, 13-уми феврал Хадамоти федералии амнияти Русия (ФСБ) дар пайи амалиёте чанд нафареро, ки гуфта мешуд, қасди фаъолияти терористӣ доштанд, кушт, ки баъдтар маълум гашт 3 нафари онҳо шаҳрвандони Тоҷикистон будаанд.
Дар гузориши ин ниҳод омада, ки ин афрод дар ҳоли омода кардани бомбаи худсохт барои таркондани истгоҳи роҳи оҳан буданд ва аз ҷониби нерӯҳои амниятӣ кушта шудаанд. Мақомоти Русия иддао дорад, ин афрод узви созмони терористии байналмилалие будаанд, аммо узви кадом созмон буданаш зикр нашудааст.
Ба итиилои Радиёи Озодӣ, чанде аз муҳоҷирони тоҷики муқими Пскови Русия гуфтаанд, ки ҳамдиёрони онҳо Парвиз Рустамов, Ҷовид Ҷумъаев ва Азизҷон Аъзамқулзода дар амалиёти нерӯҳои амниятии Русия дар як бӯстонсаро дар канораи шаҳри Псков кушта шудаанд.
Аммо тоҷикони муқими Псков ва хонаводаҳои фавтидаҳо дар суҳбат бо расонаи “Мигрант Медия”-и Радиои Озодӣ гузориши мақомотро рад мекунанд.
Як муҳоҷир дар Псков бо номи Беҳзод гуфта, ки “Ин бачаҳоро нағз медонам, онҳо хело дар дил орзуҳо доштанд, ҳама аз пайи кор буданд. Ҳеҷ кас бовараш намеояд, ки инҳо ба ҳамин кор даст заданд. Ин бачаҳо бачаҳое набуданд, ки барои пул шуда чунин кунанд. Онҳоро ба дом андохтанд.”
Гуфта мешавад, ҷавонони кушташуда, Парвиз Рустамов аз шаҳри Турсунзода, Ҷовид Ҷумъаев ва Азизҷон Аъзамқулзода аз шаҳри Панҷакент будаанд. Шоҳидон низ гуфтаанд, ки дар аввал онҳо дар ресторани “Чайхона”-и шаҳри Псков кор мекарданд. Баъдтар Азизҷон дар маркази савдои “Акваполис” ба кор рафта, Парвиз ба таксиронӣ машғул шудааст.
Расонаҳои Русия дар такя ба маълумоти ФСВ хабар дода буданд, ки ин ашхос дар ҳоли омода кардани бомб барои таркондани истгоҳи роҳи оҳан буданд, ки тавассути нерӯҳои амниятӣ ба қатл расидаанд. Фармондори вилояти Псков Михаил Ведерников аз нерӯҳои амниятӣ барои пешгирӣ аз ҳамлаи тераристӣ қадрдонӣ када ба мардум гуфтааст, ки танҳо ба гузоришҳои расмӣ такя кунанду ба гуфтаи ҳар касе бовар накунанд, чун дар ин бора дурӯғҳои зиёде пахн хоҳад шуд.
Падари Азизҷон, Бозорбой Аъзамқулзода 17-уми феврал зимни суҳбаташ бо расонаи “Мигрант Медия” барои радди иттиҳоми терорист будани фарзандаш гуфт, ки писараш одами диндоре набуд ва намоз ҳам намехонд.
Дигар муҳоҷироне, ки ин афродро аз наздик мешинохтанд, аз онҳо ҳимоят карда, чунин амалеро ба онҳо нисбат намедиҳанд. Ҷовид, дар шабакаи “В Контакте” саҳфае дорад бо номи “Давид”. Ӯ дар сафҳаи худ бештар ҳунари ошпазияшро бо ширинкорӣ ба намоиш гузоштааст.
Дар шабакаҳои иҷтимоӣ фарзияи мақомотро корбарон зери суол бурда, навиштаанд, ки ин “дурӯғ аз тарафи мақомот аст”. Корбарон ҳамчунин навиштаанд, ки “дар асри дронҳо касе чунин бомбҳо омода намекунад.”
Солҳои ахир иттиҳомоти ҳамлаҳои террористии зиёде ба шаҳрвандони Тоҷикистон нисбат дода мешавад, ки вазъиятро барои муҳоҷирони кории тоҷик дар Русия ва ҳатто дар дигар кишварҳо вахимтар кардааст.
