Мақомоти Тоҷикистон дар моҳи январи соли ҷорӣ ба маблағи беш аз 6,5 млн доллар нерӯи барқ ба хориҷ содир кардаанд.
Бино ба иттилои Агентии омори назди президент, ин нишондиҳанда нисбат ба ҳамин давраи соли гузашта 2,7 баробар бештар будааст.
Гуфта мешавад, ин омор ҳатто аз чанд моҳи соли гузашта низ зиёд буда, дар моҳи октябр интиқоли барқ аз Тоҷикистон ба хориҷи кишвар ба маблағи 3,8 млн доллар, моҳи ноябр – 4,2 млн доллар ва декабр – 6,4 млн доллар сурат гирифта будааст.
Интиқоли барқ аз Тоҷикистон ба хориҷ дар ҳоле зиёд шуда истодааст, ки сокинони кишвар бо лимити барқ рӯ ба рӯ буда, аз охири моҳи сентябр барои сокинони деҳоти Тоҷикистон дар як шабонарӯз ҳамагӣ 8 соат ва дар баъзе минтақаҳои дурдаст аз ин ҳам камтар барқ дода мешавад.
Аммо мақомоти кишвар лимити барқро дар кишвар ҳамеша ба кам шудани об дар обанборҳо ва ё бештар шудани истифодабарандагони он рабт медиҳанд, вале он бе мамоният ба хориҷи кишвар интиқол меёбад.
Тоҷикистон барқро асосан ба кишварҳои Афғонистон, Узбекистон ва Қирғизистон содир мекунад.
Мақомоти кишвар иддао доранд, ки нерӯи барқ ба Афғонистон дар мавсими тирамоҳу зимистон дар ҳаҷми начандон зиёд ва ба Узбекистон танҳо дар мавсими тобистон интиқол мешавад.
Тибқи оморҳои Вазорати энергетика, аз Тоҷикистон ба хориҷ дар соли 2024 ҳудуди 2,5 млрд киловатт-соат барқ содир шудааст, ки бештар аз ҳама ба Афғонистон – 1 млрд 530,4 млн кВт/соат ба маблағи 705,2 млн сомонӣ, ба Узбекистон ба маблағи 201,2 млн сомонӣ 943,9 млн киловатт-соат ва ба Қирғизистон – 4 млн киловатт-соат нерӯи барқ ба маблағи 428,7 ҳазор сомонӣ барқ содир шудааст.
Нархи ҳар як киловатт-соат нерӯи барқ барои Афғонистон 46 дирам (4,2 сент), барои Узбекистон 21,2 дирам (ҳудуди 2 сент) ва барои Қирғизистон 10,7 дирам (0,98 сент)-ро ташкил додааст.
Ин дар ҳолест, ки арзиши миёнаи таърифаҳои нерӯи барқ дар дохили кишвар 35 дирҳам барои 1 кВт/соат буда, мақомот қасд доранд онро боло баранд.
