Кумитаи ҳолатҳои фавқулоддаи Тоҷикистон хабар дод, ки рӯзи 3-юми марти соли ҷорӣ дар натиҷаи фаромадани тарма дар роҳи Душанбе – Хуҷанд 7 нафар зери барф монданд.
Гуфта мешавад, ҳодисаи фаромадани тарма рӯзи 3-юми марти соли 2025, соати 15:00 дар километри 68-уми шоҳроҳи Душанбе-Хуҷанд рух дод. Дар хабар гуфта шуда, ки наҷоттиҳандагони КҲФ тавонистанд “7 нафарро, ки бо ду мошин аз Хуҷанд ба Душанбе ҳаракат мекарданд, аз зери барфи баланд зинда берун бароранд. Ба осебдидагон ёрии аввалин расонида шуда, ба минтақаи бехавф интиқол дода шуданд.”
КҲФ дар хитоб ба шаҳрвнадон ва меҳмонони кишвар мегӯяд, ки “тибқи маълумоти Агентии обуҳавошиносии кишвар, то 6 марти соли 2025 дар самти Душанбе – Хуҷанд – Чаноқ (км 62-74) ва дар ғарби Вилояти Мухтори Кӯҳистони Бадахшон хатари фаромадани тарма боқӣ мемонад.”
Бар ин асос КҲФ аз сокинони кишвар даъват карда, ки аз сафар ва рафтан ба минтақаҳои хавфи тармафароӣ худдорӣ намуда, ҳушёру эҳтиёткор бошанд.
Қаблан Агентии обуҳавошиносӣ вазъи обу ҳавои кишварро барфӣ ва номусоид арзёбӣ карда, аз шаҳрвандон хоста буд, ки ҳангоми сафар ба минтақаҳои кӯҳӣ эҳтиёт кунанд.
