Мақомоти Тоҷикистон беш аз 20 сокини маҳаллаи “Дарвоз”-и ноҳияи Фирдавсии шаҳри Душанберо боздошт кардаанд.
Радиои Озодӣ дар истинод ба манобеаш менависад, ки аксар боздоштшудаҳо зодагони ҷамоати Язгуломи ноҳияи Ванҷ ҳастанд. Чанд нафари онҳоро рӯзи 9-уми март дар маросими дафни яке аз сокинони ҳамин маҳалла ва боқимондаро аз хонаҳояшон дастгир кардаанд.
Дар ҳамин ҳол пайвандони боздоштшудаҳо бо шарти фош нашудани номашон ба Радиои Озодӣ гуфтаанд, ки бо гузашти се рӯз аз аҳволи фарзандонашон хабар надоранд ва намедонанд, ки онҳо ба чӣ гумонбар ҳастанд.
Мақомоти Тоҷикистон низ то ҳол сабаби боздошти сокинони маҳаллаи “Дарвоз”-ро шарҳ надодаанд.
Ин бори аввал нест, ки мақомоти кишвар зодагони Язғуломро ба таври гурӯҳи боздошт мекунанд. Дар моҳи майи соли 2024 Azda.tv аз амалиёти вежаи Кумитаи давлатии амнияти миллии Тоҷикистон дар водии Язгуломи Вилояти Мухтори Кӯҳистони Бадахшон ва боздошти беш аз 20 сокини ҳамин водӣ хабар дода буд.
Пас аз муддате хомушӣ Абдураҳмон Аламшозода, муовини аввали вазири корҳои дохилии Тоҷикистон дар моҳи августи 2024 ин хабарро тасдиқ кард ва гуфт, ки мақомот 27 нафарро бо гумони узвият дар гурӯҳи “Ансоруллоҳ” дастгир кардаанд ва 4 нафари дигарро дар берун аз кишвар меҷӯянд. Назари худи боздоштшудаҳо то ҳол дастрас нест.
