Фармондеҳи низомии Толибон Амнуддини Мансур, ки чанд рӯз пеш дар наворе дар бораи ҳуҷум ба Тоҷикистон мегуфт, аз Тоҷикистон узрхоҳӣ кард.
Ӯ дар навори видеоие мегӯяд, он наворе, ки чанд рӯз пеш аз ӯ нашр шудааст, навори бисёр куҳна аст, вале “рақибон” онро ҳоло бо ҳадафи бад сохтани муносибатҳои ду кишвари ҳамсоя дар расонаҳо нашр кардаанд.
Амониддини Мансур дар изҳороташ мегӯяд, мусолаҳае, ки дар Қатар сурат гирифт, Иморати исломӣ таъаҳҳуд гирифта, ки аз қаламрави Афғонистон ба ҳеч кишвари ҳамсоя хатар таҳдид намекунад. Ва мо ба ин таъаҳҳуди худ пойбанд ҳастем.
Ӯ ҳамчунин таъкид кард, ки “мо бо кишвари Тоҷикистон ҳамосягии бисёр нек дорем ва аз тарафи онҳо ҳеч зараре надидаем ва онҳо низ аз тарафи мо ҳеч зараре нахоҳанд дид.”
Ин фармондеҳи Толибон дар ҳоле мегӯяд, ки навори чанд рӯз пеш нашршудааш “бисёр қадимӣ” аст, ки ӯ дар бораи ҷанги Украина ва гирифтории Русия дар он мегӯяд. Ва маълум аст, ки Толибон моҳи августи соли 2021 ба қудрат расиданд ва ҷанги Русия бо Украина моҳи феврали соли 2022 оғоз шуда буд.
Ӯ гуфта буд, ягона мушкилие, ки барои гирифтани Тоҷикистон вуҷуд дорад, “Ин ҳузури русҳост.” Аммо бо итминон меафзояд, русҳо дар ҷанги Украина хеле гирифтор шудаанд ва ин ҳам барояшон мушкилсоз буда наметавонад.
Ёдовар мешавем, ки Амониддини Мансур, яке аз фармондеҳони тоҷикони номдори Бадахшони Афғонистон дар навори собиқаш Тоҷикистонро ба ҳамлаи низомӣ таҳдид карда буд. Ин фармондеҳ гуфта буд, ки нерӯҳояш дар вилоятҳои Тахор ва Бадахшон мунтазири дастур ҳастанд то вориди Тоҷикистон бишаванд.
Ин фармондеҳи тоҷиктабори Толибон низ гуфта буд: “Агар иҷозат диҳад Иморати исломӣ, гирифтани Тоҷикистон ба каллаи ман.” Ӯ дар идома мегӯяд, “дар як рӯз вилояти Бадахшони Тоҷикистонро мегирем.”
Ҳамчунин дар ин навор шунида мешавад, ки яке аз ҳозирин мегӯяд, “Тоҷикистон ҳеч чизе надорад. Яктояшра заддӣ ҳаммаш мегурезед.”
Ин бори аввал нест, ки намояндагони Толибон ба Тоҷикистон таҳдид мекунанд. Қаблан ҳам Мавлавӣ Абдулҳамиди Хуросонӣ низ дар хитобе ба мақомоти Тоҷикистон чунин таҳдиде карда буд, аммо баъд аз чанде боз узрхоҳӣ кард.
Ҳамчунин қаблан гурӯҳи ДИИШ-и Хуросон, ки дар Афғонистон ҷойгиранд, низ борҳо барои ҳамла ба Тоҷикистон таҳдид карда буданд.
Бархе таҳлилгарон бар ин назаранд, ки Толибон ҳамчунон ба дунболи таҳкими қудрати худ дар минтақа ҳастанд ва аз ҳар фурсате барои навмоиши қудрат ва тарсдиҳӣ мехоҳанд истифода кунанд.
