Аз 1-уми апрели соли ҷорӣ дар шаҳрҳои Русия кӯдакони муҳоҷирон зимни имтиҳони шифоҳӣ бояд ҳадди ақал аз 5 бал 3 бал дарёфт кунанд то ба синфи 1 роҳ ёбанд.
Дар ин бора нашрияи “Коммерсант” бо истинод ба фармони содиршудаи Хадамоти назорат дар соҳаи маорифи Русия (Рособрнадзор) хабар додааст.
Бино ба ин гузориш, лоиҳаи “ҳадди ақал балҳо”-ро Рособрнадзор 12-уми феврал ба Думаи давлатӣ пешниҳод кард, ки тибқи он дар имтиҳони забони русӣ кӯдакони шаҳрвандони хориҷӣ бояд дасти кам 3 бал (аз 5 бал) ба даст оранд.
Дар ҳамин ҳол Вазорати маорифи Русия хабар додааст, касоне, ки ба синфҳои 2-11 шомил шуданӣ ҳастанд, бояд ба иловаи имтиҳони шифоҳӣ аз имтиҳони хаттӣ низ гузаранд.
Моҳи декабри соли 2024 қонуни манъи кӯдакони муҳоҷире, ки аз имтиҳони забони русӣ намегузаранд, ба Думаи давлатии Русия пешниҳод шуд, ки Дума аз он тарафдорӣ кард. Қарор аст тағйирот ба қонун “дар бораи маориф” аз 1-уми апрели соли 2025 мавриди амал қарор бигирад. Аз ин вақт кӯдакони шаҳрвандони хориҷӣ бояд забони русиро дар сатҳи зарурӣ барои “азхудкунии меъёрҳои федералӣ дар соҳаи маориф” бидонанд.
Ба андешаи бархе таҳлилгарон, маҳдудиятҳои нав барои шомилшавии фарзандони муҳоҷирон ба мактабҳои Русия аз ҷумлаи иқдомоти ҳукумати ин кишвар аст, ки дар пайи ҳамла ба “Крокус Сити Холл” барои сахттаркунии шароити муҳоҷирон тасвиб мешавад.
Давоми чанд моҳи ахир Думаи давлатӣ алайҳи муҳоҷирон ва барои маҳдуд кардани шароити онҳо қонунҳои зиёдеро қабул кард, ки баъзе таҳлилгарон онро интиқомгирӣ мақомдорон аз муҳоҷирон унвон мекунанд. Манъ шудани кори муҳоҷирон бо баҳонаи амниятӣ дар баъзе соҳаҳо, додани иҷозат ба Вазорати корҳои дохилӣ барои ихроҷи муҳоҷирон бе қарори додгоҳ ва манъи кӯдакони муҳоҷир аз мактабҳои таълимӣ, ки забони русиро намедонанд аз ҷумлаи қавонини тасвибшуда мебошад.
