Нерӯҳои марзбонии Лаҳистон чанд шаҳрванди Тоҷикистонро боздошт ва аз ин кишвар ихроҷ карданд.
Рӯзи душанбе, 18-уми март ҳавопаймои низомии Каса аз фурӯдгоҳи Краков-Балисе бо 14 шаҳрванди хориҷие, ки аз Лаҳистон ихроҷ шудаанд, парвоз кард.
Гуфта мешавад, миёни ихроҷшудагон 4 шаҳрванди Гурҷистон, 7 шаҳрванди Узбекистон ва 3 шаҳрванди Тоҷикистон будаанд.
Мақомоти Лаҳистон аз ин афрод ном набурдаанд, аммо онҳо ба вайрон намудани қоидаи роҳ, аз ҷумла дар ҳолати мастӣ рондани мошин, терроризм ва хатар ба амнияти миллӣ, инчунин содир намудани дуздиву ҷиноятҳои дигар гумонбар мебошанд.
Пас аз муроҷиати Доналд Туск, нахуствазири Лаҳистон ба раҳбарони вазоратҳои умури дохилӣ ва адлия барои таҳияи нақшаи сареъ барои вокуниши фаврӣ ба ҷиноятҳои созмонёфтаи хориҷиён, нерӯҳои марзбонии Лаҳистон барои баргардонидани ҳам ихтиёрӣ ва ҳам иҷбории хориҷиён пайваста амалиёт мегузаронанд.
Тибқи иттилои расмии мақомоти Лаҳистон, аз аввали соли 2024 маъмурони нерӯҳи марзбонии ин кишвар фармони ихроҷи тақрибан 3000 хориҷиро содир кардаанд.
