Рӯзи 25-уми марти соли ҷорӣ вакилон лоиҳаи қонуни навъи патентеро ба Думаи давлатии Русия пешниҳод кардаанд, ки кори муҳоҷиронро дар ин кишвар маҳдудтар мекунад.
Ҳаммуаллифи ин ташаббус, раиси Кумитаи меҳнат ва сиёсати иҷтимоии Думаи давлатӣ Ярослав Нилов ба расонаҳо гуфтааст, ки ҳадафи ин қонун танзими муҳоҷирати корӣ ва рафъи нобаробарӣ дар бозори кор аст.
Ба гуфтаи Нилов, дар ҳоли ҳозир ба хориҷиён патенти универсалӣ дода мешавад, ки ба онҳо имкон медиҳад, ки дар ҳама соҳа – аз сохтмон то хаткашонӣ кор кунанд.
Инчунин ӯ таъкид кардааст, ки хориҷиён бояд ба он соҳаҳое ҷалб шаванд, ки дар онҳо эҳтиёҷоти воқеӣ вуҷуд дорад, на ба он соҳаҳое, ки барояшон қулайтар аст. Ҳамзамон ӯ эътироф карда, ки масъалаи нарасидани қувваи корӣ дар баъзеҳо соҳаҳо назаррас аст.
Нилов иддао кардааст, ки ин чораҳо шояд шумораи муҳоҷирони меҳнатиро коҳиш надиҳад, балки барои барқарор кардани тартибот дар бозори кор мусоидат кунад. Вай таъкид карда, ки патент барои муҳоҷири корӣ бояд “бо дархост дар соҳаи мушаххас, корхонаи мушаххас, минтақаи мушаххас” дода шавад ва ба Вазорати корҳои дохилии Русия салоҳият дода шавад, ки тартиби додани чунин ҳуҷҷатҳоро муайян кунад.
Инчунин дар ин шабу рӯз як гурӯҳи дигари вакилон аз Ҳизби либерал-демократии Русия ба хотири пур намудани буҷаи кишварашон тарҳи қонунеро пешниҳод кардаанд, ки тибқи он андоз барои муҳоҷирони корӣ то 30% боло бурда мешавад. Дар ҳоли ҳозир муҳоҷирон вобаста ба маблағи даромад аз 13% то 22% андоз месупоранд ва бо қабули ин тарҳ ҷайби бе ин ҳам холии муҳоҷирон холитар ва мушкилоташон бештар хоҳад шуд.
Баъд аз ҳодисаи хунин дар “Крокус Сити Ҳолл” мақомоти Русия фишор болои муҳоҷирони кориро бештар карда, барои маҳдуд кардани фаъолияти онҳо қонунҳои зиёдеро қабул карда истодаанд. Ҳатто кори муҳоҷирон бо баҳонаи амниятӣ дар баъзе соҳаҳо, аз ҷумла таксиронӣ дар аксар минтақаҳои ин кишвар манъ шуда, нархи иҷозатномаи корӣ ҳам гарон шудааст.
