Вазорати корҳои дохилии Тоҷикистон бо нашри як иттилоияе аз муҳоҷирони кории тоҷик, ки дар Русия қарор доранд, даъват намудааст то 30-юми апрел ҳуҷҷатҳо ва ҳузури худро дар ҳудуди ин кишвар қонунӣ гардонанд.
Дар ин иттилоия, ки 25-уми марти соли ҷорӣ дар сомонаи ВКД нашр шудааст, гуфта мешавад, муҳоҷирони тоҷике, ки “дар ҷойи истиқоматашон худро ба қайд нагирифтаанд, патенти корӣ надоранд ё барои он ҳармоҳа боҷ напардохтаанд ва инчунин ба рӯйхати шахсони таҳти назорат қарордошта дохил карда шудаанд, метавонанд аз ҳудуди Россия хориҷ нашуда, ҳуҷҷатҳои худро ба тартиб дароварда, имконияти қонунӣ кор карданро дар қаламрави Россия пайдо намоянд”.
Аммо ин ниҳод нагуфтааст, ки муҳоҷирони тоҷик дар ин кишвар дар куҷо метавонанд, ки ҳузури худро қонунӣ кунанд.
Дар рӯйхати шахсони таҳти назорати Русия, ки ВКД-и Тоҷикистон аз он ном бурдааст беш аз 120 ҳазор шаҳрванди Тоҷикистон, ки муҳлати ҳуҷҷатҳояшон гузаштааст ё бекор шудаанд, инчунин онҳое, ки қонунвайронкунии маъмурӣ содир кардаанд, оварда шудааст.
Вазорати меҳнат ва муҳоҷирати Тоҷикистон ва намояндагии он дар Русия низ аз муҳоҷирони тоҷик дархости монанд ба ВКД дохилиро карда, таъкид кардаанд, ки агар муҳоҷирон дар муҳлати муайяншуда аз қайд нагузаранд ба рӯйхати шахсони ихроҷшаванда ворид мегарданд.
Инчунин намояндагии Вазорати меҳнати Тоҷикистон дар Русия аз шаҳрвандоне, ки қасди рафтан ба ин кишварро доранд хостааст, ки пеш аз сафар дар Душанбе аз санҷиши манъи вуруд ва изи ангушт гузаранд, то тавонанд бемушкил ба қаламрави Русия ворид шуда, гирифтани патент барояшон осон гардад.
Ёдовар мешавем, ки президенти Русия Владимир Путин дар охирҳои соли 2024 фармонеро имзо кард, ки тибқи он муҳоҷироне, ки дар ҳудуди ин кишвар ғайриқонунӣ қарор доранд, уҳдадоранд то 30-юми апрели соли 2025 ҳуҷҷатҳои худро дуруст ё Русияро тарк кунанд.
