Шӯрои уламои Маркази исломии Тоҷикистон бо нашри қароре рӯзи баргузории Иди Рамазонро дар қаламрави Тоҷикистон эълон кард.
Мувофиқи қарори ин ниҳоди динии кишвар, ки рӯзи 27-уми март нашр шудааст, Иди Рамазон дар ҳудуди ҷумҳурӣ рӯзи якшанбе, 30-юми марти соли 2025 баргузор мешавад.
Дар ин қарор гуфта мешавад, ки дар тамоми масҷидҳои ҷумҳурӣ намози Иди сайиди Рамазон соати 6:45 дақиқаи субҳ хонда мешавад.
Шӯрои уламо имомхатибони кишварро муваззаф карда, ки барои кумак расондан ба муҳтоҷон ва пешгирӣ аз исрофкорӣ дар рӯзҳои ид мардумро даъват кунанд ва инчунин худашон бояд намунаи ибрат бошанд.
Ин дархости Шӯрои уламо аз имомхатибон дар ҳолест, ки ба гуфтаи сокинон, мардуми одди дар чунин рӯзҳо чандон ба исрофкорӣ даст намезананд, аммо худи кормандони давлат, имомхатибону шахсони маъруф дар исрофкорӣ пешқадаманд.
Ҳамзамон Шӯрои уламо аз ҳар як имомхатиби масҷиди ҷомеи кишвар 1000 сомонӣ ҳаққи аъзогии масҷидҳоро талаб кардааст. Ва гуфта шуда, ки бояд ин маблағ аз ҳисоби намозгузорони Ид ҷамъоварӣ ва ба хазинаи Маркази исломӣ супорида шавад.
Ҳамасола бо муайян кардани ҷашнҳои динӣ Шӯрои уламо маҳдудиятҳоеро дар баргузории онҳо ҷорӣ мекунанд. Азҷумла, соли гузашта “идгардак”-и кӯдакон, ки бахше аз хурсандии ин рӯз барои кӯдакон аст, боздошта буд. Ва ин қарор дар байни ҷомеаи кишвар вокуниши зиёдеро ба бор овард. Бархе мегуфтанд, ки Маркази исломӣ ва Кумитаи дини кишвар на танзимгари умури динӣ, балки қарорҳо ва хостаҳои мақомдорони болоиро ҳамчун қонун болои урфу одати мардум таҳмил мекунанд.
Ёдовра мешавем, ки имсол аввали моҳи Рамазон аз 1-уми март оғоз шуда буд. Ва чун мувофиқи солшумории ҳиҷрӣ моҳи шаъбон 30 рӯзи комил буд, моҳи Рамазон 29 рӯз омад. Ва тақрибан тамоми мусалмонони дунё рӯзи 30-юми мартро рӯзи Иди Рамазон ҷашн мегиранд.
Бо истифода аз ин фурсат, ҳайати эҷодии Azda TV низ тамоми мусалмонони дунё, бахусус ҳамватони азиз ва мардуми мусалмони Тоҷикистонро бо фарорасии Иди Рамазон муборакбод мегӯяд! Аз Худованд барои якояки шумо тансиҳатӣ, хушиву бурдборӣ, дастархони пур аз нозу неъмат ва саодати ҳарду оламро орзуманд аст.
