Дар ҳафтаи гузашта ба далели боришоти шадид дар минтақаҳои мухталифи кишвар ҳодисаҳои зиёновар, аз ҷумла резиши кӯҳпора ва санг рух дода, харобиҳоеро ба бор овардааст.
Бино ба иттилои Кумитаи ҳолатҳои фавқулодаи Тоҷикистон, давоми рӯзҳои 28-уми март то 1-уми апрели соли 2025 дар баъзе минтақаҳои кишвар бар асари боришоти шадид, омадани сел, резиши санг дар роҳҳои кӯҳӣ ва ба болои бинои истиқоматӣ афтодани дарахт ба қайд гирифта шудааст.
Ба гуфтаи манбаъ, баъд аз зуҳри 31-уми марти соли ҷорӣ дар километри 25-уми роҳи мошингарди Левакант-Данғара резиши санг рух дод, ки бар асари ин ҳодиса ду мошини сабукрав зарар диданд ва яке аз мусофирони ин мошинҳо ҷароҳати вазнин бардошта, дар беморхонаи шаҳри Леваканд бистарӣ шудааст.
Ҳамин тавр зуҳри 27-уми март дар шоҳроҳи Душанбе-Кӯлоб-Ванҷ-Хоруғ дар наздикии ҷамоати деҳоти Водхуди ноҳияи Ванҷи ВМКБ низ резиши рег ва санг ва осеб дидани мошинҳо гаштааст.
Ин ниҳод мегӯяд, боришоти шадиди ҳафтаи ахир ва омадани сел низ дар ноҳияи Бобоҷон Ғафуров ва Мастчоҳи вилояти Суғд беш аз 20 сар чорвои хурдро нобуд кард.
КҲФ ба шаҳрвандон ҳушдор додааст, ки эҳтимоли вуқуи ҳодисаҳои мушобеҳ дар рӯзҳои оянда вуҷуд дорад ва таъкид карда, ки қоидаҳои бехатарии шахсиро риоя намуда, аз сайругашт дар кӯҳҳо, ҷамъоварии ҳезум, шикор, моҳидорӣ ва ғайра худдорӣ кунанд.
