Мақомоти Русия эътироф карда, ки сафи муҳоҷирони Осиёи Марказӣ дар ин кишвар коҳиш ёфтааст ва ин ба иқтисоди Русия бетаъсир нахоҳад буд.
Ба гуфтаи Александр Сафонов, профессори Донишгоҳи иқтисодии назди ҳукумати Русия, муҳоҷирони кишварҳои Тоҷикистон, Узбекистон ва Қирғизистон солҳои ахир Русияро тарк карда истодаанд. Онҳо, ки то ин дам Русияро ҳамчун кишвари кор интихоб мекарданд, ҳоло бештар ба Чин, Кореяи Ҷанубӣ ва Аврупо мераванд.
Ин профессори Донишгоҳи иқтисодӣ мегӯяд, тарки Русия аз ҷониби муҳоҷирон ба коҳиши қурби рубли русӣ ва сиёсати зидди муҳоҷирати мақомдорони ин кишвар рабт дорад.
Коршиносони масоили иқтисодии Русия бар ин назаранд, ки раванди тарк кардани Русия аз ҷониби муҳоҷирони кишварҳои Осиёи Марказӣ дар оянда низ идома хоҳад кард. Зеро ба гуфтаи онҳо, иқтисоди кишварҳои мазкур дар ҳоли рушди босуръат аст ва шаҳрвандони зиёде дар дохили кишварҳои худ кор пайдо хоҳанд кард.
Таҳлилгарон масъалаи муҳоҷирати корӣ ба Русияро, ки солҳо боз яке аз самтҳои асосии кору даромади муҳоҷирон маҳсуб меёфт, дигар ҳамчун стратегияи устувор намедонанд. Ба назари онҳо, тағйироти сиёсӣ, мушкилоти иқтисодӣ ва таҳдидҳои афзояндаи табъизу маҳдудиятҳо дар ин кишвар, муҳоҷирони кориро дар ҳолати ногувор қарор додаанд, ки маҷбур ба тарки Русия шаванд.
Гуфта мешавад, Тоҷикистон ин равандро ба назар гирифта, ба ҷои таъмини ҷойҳои корӣ дар дохили кишвар, бо давлатҳои Аврупо ва Осиё, аз ҷумла Лаҳистон, Туркия ва Руминия вориди гуфтугӯ шуда, роҳҳои нави муҳоҷирати кориро ҷустуҷӯ дорад.
Ба назари мунтақидони ҳукумати Эмомалӣ, ин фурсатест, ки Тоҷикистон бояд дар дохили кишвар ҷойҳои корӣ таъмин кунад ва мушкилоти муҳоҷиратро коҳиш диҳад. Аммо чун қисмати зиёди буҷаи давлатии Тоҷикистон аз даромади муҳоҷирон вобаста аст, мақомоти кишвар намехоҳанд ин даромад коҳиш ёбад, бинобар ин, роҳҳои нави муҳоҷиратро ҷустуҷӯ доранд.
