Бархе аз шаҳрвандони кишвар дар тамос бо Azda.tv аз он шикоят карданд, ки бо вуҷуди пурра пардохт кардани маблағи нерӯи барқ, боз ҳам қарздор мешаванд.
Ба гуфтаи ин манбаъ, (аз ифшои номаш худдорӣ мекунем) ҳар моҳ маблағи истифодаи нерӯи барқро тибқи нишондоди ҳисобкунак мепардозад, аммо бо вуҷуди пардохти комил, қарзи изофӣ аз ҷониби масъулон нишон дода мешавад.
Ин шаҳрванд иддао мекунад, ки танҳо дар як моҳ нишондоди ҳисобкунаки барқаш ба 1500 сомонӣ расидааст. Ӯ мегӯяд, аз панҷ пардохти охиринаш се адад пурра қабул шудаанд, вале боқимонда маблағро масъулон ҳамроҳ бо “Амонатбонк” аз ҳисоби ӯ мегиранд.
Ба гуфтаи ӯ, муроҷиат ба роҳбарияти ширкати барқ натиҷа надода ва ба ҷои баррасии мушкил танҳо гуфтаанд, “ба ҳар куҷо шикоят барӣ бурдан гир“. Ин шаҳрванд аз расонаҳо хостааст, ки ба масъалаи вай расидагӣ кунанд ва онро ба гӯши масъулони сатҳи болоӣ расонанд.
Шикояти сокинон дар ҳолест, ки чанде пеш Вазорати энергетика ва захираҳои оби Тоҷикистон дар нишасти матбуотӣ аз афзоиши нигаронкунандаи қарзи сокинон барои истифодаи барқ хабар дода буд.
Тибқи омори расмӣ, танҳо аҳолии кишвар то моҳи июли соли равон аз ширкати “Барқи тоҷик” барои истифодаи нерӯи барқ беш аз 1,7 миллиард сомонӣ қарздоранд.
Аммо бисёре аз таҳлилгарон ва рӯзноманигорон ҳаҷми зиёди қарзи мардумро аз идораи барқ шубҳаангез мешуморанд.
Мақомот ҳамеша дар посух ба ин савол, ки чӣ гуна мардум аз барқ қаздоранд, мегӯянд, қисме аз ин қарзҳо аз солҳои пеш боқӣ мондаанд. Аммо сокинон ин иддаои мақомотро қабул надоранд ва мегӯянд, ки мардуми оддӣ наметавонад солҳо аз барқ қарздор боқӣ бимонад, зеро ҳама хуб медонад, ки дар сурати нападохтани пули барқ масъулон барқро қатъ мекунанд.
Ҳамчунин ҳамасола дар фасли зимистон интиқоли барқ барои мардум хеле маҳдуд мешавад ва қариб, ки мардум ба ҷуз рӯшноӣ барқро дар дигар чиз истифода намебаранд. Имсол бошад, ҳатто дар фасли тобистон низ сокинон аз маҳдудияти барқ хабар доданд.
