Дар вилояти Астрахон номи Муҳаммад ба яке аз маъмултарин номҳо миёни навзодони мард табдил ёфтааст.
Ба иттилои расонаҳои Русия, дар соли 2024 ин ном дар мақоми дуюм қарор гирифт, аммо чанд соли пеш дар минтақаи Ханти-Мансийск низ ба ҷойи аввал баромада буд.
Сергей Миронов, раиси фраксияи “Справедливая Россия — За правду” дар Думаи давлатӣ, ин равандро натиҷаи тағйироти иҷтимоӣ ва фарҳангӣ дониста, гуфт, ки он бояд аз ҷониби ҷомеа ва сиёсатгузорон ҷиддӣ баррасӣ шавад.
Ба гуфтаи ӯ, интихоби номи Муҳаммад аз ҷониби хонаводаҳои зиёди шаҳрвандон нишонаи нигоҳдории арзишҳои динӣ ва ҳувияти миллӣ аст. Ин тамоюл метавонад ба равандҳои демографӣ ва сиёсати миллӣ таъсир гузорад.
Мақомот мегӯянд, чунин тағйирот нишон медиҳад, ки ҷомеаи Русия рӯ ба гуногунрангӣ дорад ва дар оянда масъалаҳои ҳамзистӣ ва мутобиқсозии фарҳангҳо бештар аҳамият хоҳанд ёфт.
Сергей Миронов яке аз мухолифони муҳоҷирони корӣ шинохта мешавад ва борҳо аз ҳузури муҳоҷирон дар Русия норозигӣ баён кардааст.
