Тоҷикистон мехоҳад бо пайвастшавии мустақим ба шабакаҳои телекоммуникатсионии Чин суръати интернетро боло ва арзишашро дар кишвар пойин барад.
Бино ба иттилои Хадамоти алоқаи кишвар, барои амалӣ намудани он ширкати Тоҷиктелеком лоиҳаи кашидани хатти оптикӣ ва симчӯбҳоро то марзи Чин (Душанбе-Кӯлоб-Дарвоз-Рӯшон-Хоруғ-Қулма) рӯйи даст гирифтааст.
Тибқи ин лоиҳа дар марҳилаи аввал то ноҳияи Дарвоз дар масофаи 182 киллометр симчӯбҳои алоҳида насб гардида, дар қитъаҳои дигар ба воситаи симчӯбҳои нерӯи барқ хатти оптикӣ кашида мешавад ва аз моҳи июли соли 2025 то имрӯз 108 киллометри он пайваст карда шудааст.
Ба иттилои Бахтовар Абдусатторов, муовини аввали Директори генералии “Тоҷиктелеком” корҳои пайвастсозӣ то охири соли равон ба маркази ноҳияи Дарвоз расонида шуда, интиқоли интернет аз Душанбе ба Дарвоз шуруъ мешавад.
Марҳилаи дуюм аз аввали соли 2026 шуруъ шуда, дар назар аст, ки то охири сол ба сарҳади Тоҷикистону Чин расонида шавад, яъне сокинон пас аз пайвастшавӣ бояд бо интернети дорои суръати баланду нархи арзон дастрасӣ пайдо кунанд.
Дар ҳоле мақомоти Тоҷикистон аз интернети бо суръати баланду нархи арзон мегӯяд, ки чанд соли охир соҳаи алоқа дар кишвар бо мушкили ҷиддие рӯ ба рӯ гашта буд ва сокинони кишвар аз сифати пасту арзиши гарони он солҳо боз шикоят доранд. Тоҷикистон дар раддабандиҳони ҷаҳонӣ ҳамеша зиннаҳои поёниро дар ин маврид касб мекунад.
Ба назар мерасад, бо иваз шудани раиси Хадамоти алоқа, яъне барканор шудани Бег Сабур, ки дар замони ӯ ин соҳа аз рушд боз монда буд ва бо таъйин шудани Исфандиёри Саъдулло каме ҳам бошад, барои бартараф намудани ин мушкилот корҳои амалие анҷом дода истодаанд.
Ба гуфтаи коршиносон, пайвастшавии мустақим ба шабакаҳои телекоммуникатсионии Чин метавонад интернетро тезтар ва арзонтар кунад, вале хавфи назорат ва вобастагӣ меафзояд.
