Созмони Милали Муттаҳид аз вазъи фоҷиабори Ғазза изҳори нигаронӣ карда, мегӯяд, Исроил танҳо дар назди марказҳои тақсими ғизо наздики 2 ҳазор фаластиниро куштааст.
Масъули вежаи СММ оид ба фақр ва ҳуқуқи инсон Оливе Де Шуттер мегӯяд, барои талоши наҷоти ҷони мардум дар Дайри Балаҳ ва Хон-Юнус аллакай дер шудааст. Чун сат ба соат дар ин минтақаҳо буҳрони гуруснагӣ авҷ мегирад.
Ба гуфтаи ин масъули СММ, Исроил дар минтақаи Зайтун – ҷанубу шарқии Ғазза тамоми хонаҳоро ба хок яксон кардааст. Ҳамин корро низ дар Шуҷоия ва Туффоҳ ҳам анҷом додааст.
Аксҳое, ки баъзе расонаҳо аз моҳвора нашр карданд, ки дида мешавад, ки аксҳои қабл аз моҳи август аз моҳи август хеле фарқ мекунанд, хусусан минтақаҳои Шуҷоия ва Туффоҳ қариб ки аз байн рафтаанд.
Ба иттилои расонаҳо, танҳо дар давоми 24 соати гузашта наздики 90 нафар дар Ғазза ба дасти артиши Исроил кушта шуданд, ки 4 нафарашон дар интизори дарёти ғизо буданд ва 3 нафари дигар ба гуруснагӣ тоқат наоварда, ҷон бохтаанд.
Ба иттилои Вазорати беҳдошти Ғазза, аз 7-уми октябри соли 2023 – оғози ҳамлаҳои Исроил ба Ғазза то кунун 64 ҳазору 231 нафар кушта шуда, 161 ҳазору 583 каси дигар захмӣ шудааст. Ин ниҳод мегӯяд, омори ҷонбохтагон аз норасоии ғизо то кунун ба 370 нафар расида, ки 131 нафарашонро кӯдакону ноболиғон ташкил медиҳанд.
Дар ҳамин ҳол мақомоти Бритониё низ дар изҳороте гуфтанд, ки “мавқеи мо дар бораи ҷанги Ғазза хеле возеҳу ошкор аст. Ин расвогиҳое, ки дар Ғазза рух медиҳад, бояд ҳарчи зудтар хотима ёбад.”
Созмони Милали Муттаҳид, Юнисеф, Салиби Сурх ва чандин созмону кишварҳои дигар вазъи инсониро дар Ғазза фоҷиабор тавсиф карда, аз ҷомеаи ҷаҳонӣ хостанд, ки барои пешгирӣ аз қатлу кушторҳои бераҳмонаи Исроил дар Ғазза иқдоми фаврӣ кунанд ва болои ҳукумати Натанёҳу фишор биёранд, то гузаргоҳҳоро барои вуруди доруву ғизо боз кунад.
