Мақомоти Толибон дар гузориши ҷадиде омори ҳалокшудагони заминларзаи Афғонистонро 2205 нафар эълон карданд.
Ба иттилои ниҳодҳои расмии Толибон, заминларзаи вилояти Кунар ва атрофи он 6700 хонаро пурра хароб карда, 3640 нафар захмҳои гуногун бардоштаанд.
Бар пояи маълумоти созмони хайрияи бритониёии Islamic Relief Worldwide, 98 дарсади хонаҳо дар шаҳру навоҳие, ки заминларза рух додааст, ё ба таври комил вайрон шуда ва ё осеби ҷиддӣ дидаанд.
Ҳамзамон созмони Салиби Сурхи Афғонистон мегӯяд, ки беш аз аз 84 ҳазор нафар ба таври мустақим ва ғайримустақим дар ин фоҷеа зарар дидаанд. Ин созмон вазъияти инсонӣ дар манотиқи зилзилазадаи ин кишварро “вахим” арзёбӣ карда, аз бад шудани авзоъ нигаронӣ намудааст. Инчунин аз камбуди шадиди маводи ғизоӣ, дору ва сарпаноҳ ин созмон ҳушдор додааст.
Ин ҳам дар ҳолест, ки Маркази зилзиласанҷии Аврупо шоми панҷшанбе хабар дод, ки 4-уми сентябр соати 20:30 дақиқа ба вақти маҳаллӣ бори дигар Афғонистонро як заминларзаи сахте бо шиддати 6,2 дараҷаи Рихтер такон дод. Гуфта мешавад, маркази ин заминларза дар умқи 10-километрии замин ва 14 километр дуртар аз маркази шаҳри Ҷалолободи вилояти Нангарҳор рух додааст.
То ҳанӯз мақомоти Толибон дар маврид хисороти ҷонӣб ва моддии заминларзаи рӯзи гузашта маълумоте ироа накардаанд.
Ёдовар мешавем, ки шаби якшанбе, 31-уми августи соли ҷорӣ заминларзаи маргборе бо шиддати 6 дараҷаи Рихтер вилояти Кунар, Нангарҳор ва қисматҳое аз шақи Афғонистонро такон дод, ки дар пайи он беш аз 2200 нафра ҷони худро аз даст дод.
Ба иттилои Маркази зилзиласанҷии Аврупо, заминларзаи аввал соати 23:17 шаби якшанбеи гузашта вилояти Кунар ва шаҳру навоҳии гирду атрофи онро ларзонд. Бар асоси иттилои ин пойгоҳ, шиддати заминларза 6 дараҷаи Рихтерро ташкил дода, маркази он дар 25-километрии шаҳри Саъдобод – маркази вилояти Кунар рух додааст.
Гуфта мешавад, пас аз омодани Толибон ба сари қудрат дар Афғонистон, аз соли 2021 то кунун ҳамасола чандин маротиба заминларзаҳои шадиде дар кишвар рух додааст, ки 3-тои онро маргбортарин заминларзаҳо унвон мекунанд. Ба иттилои расонаҳо, соли 2021 дар ин кишвар дасти кам 1 заминларза, соли 2022 – 6, соли 2023 – 7, соли 2024 – 5 ва соли 2025 то кунун дасти кам 6 маротиба заминларзаҳо сабт шудааст, ки кушта ва захмиёни ин ҳамаро бештар аз 10 ҳазор нафар арзёбӣ мекунанд.
