Радослав Дарски сафири нави Иттиҳоди Аврупо дар Тоҷикистон таъйин шуд.
Бино ба иттилои расонаҳо, 5-уми сентябри соли ҷорӣ, муовини аввали вазири корҳои хориҷии Тоҷикистон Насредин Исматулло нусхаи эътимодномаи раҳбари навтаъйини намояндагии Иттиҳоди Аврупо дар Тоҷикистонро қабул кардааст.
Гуфта мешавад, то намояндаи ИА дар Тоҷикистон таъйин шуданаш, Радослав Дарски муовини мудири раёсати сиёсати аврупоии Вазорати корҳои хориҷии Лаҳистон буд ва ҳамчунин дар намояндагиҳои Иттиҳоди Аврупо дар Узбекистон, Гурҷистон ва ба ҳайси муовини сафири Лаҳистон дар Минск кор кардааст.
Ӯ хатмкардаи бахши равобити байналмилалии Донишгоҳи Вротслави Лаҳистон буда, дар баробари забони лаҳистонӣ забонҳои русӣ ва англисиро медонад.
Маълум нест ҷаноби Дарски барои беҳтар намудани вазъи ҳуқуқи башар дар Тоҷикистон чӣ талошҳоеро хоҳад кард, аммо худи ӯ гуфтааст, ки қасд дорад дар таҳкими муносибатҳои Иттиҳоди Аврупо ва Тоҷикистон саҳм гузорад ва ташаббусҳои рушди кишварро дар доираи ҳамкориҳои васеътари минтақавӣ дастгирӣ намояд.
Гуфта мешавад, дар мансаби раиси Намояндагии Иттиҳоди Аврупо дар Тоҷикистон Радослав Дарски дипломати литвонӣ Раймундас Кароблисро иваз кард. Ҷаноби Кароблис соли 2022 сафири Иттиҳоди Аврупо дар Тоҷикистон таъйин шуда буд.
